لاہور (ویب ڈیسک ) صوبائی دارالحکومت لاہورکی سب سے بڑی عدالت ہائیکور ٹ نے سیاستدانوں کی دیرینہ خواہش پوری کرتے ہوئے غداری کے قانون 124(اے) کو آئین سے متصادم قرار دے دیا ہے ۔
پاکستان ٹائم کے مطابق لاہور ہائی کورٹ نے پاکستان پینل کوڈ کی دفعہ 124 (اے) کو آئین سے متصادم قرار دے دیا ہے ، جسے غداری کا قانون کہا جاتا ہے، جو بغاوت کرنے یا حکومت کے خلاف ’عدم اعتماد‘ پھیلانے سے متعلق ہے، پاکستان پینل کوڈ کی سیکشن 124 (اے) کے مطابق جو کوئی بھی شخص زبانی یا تحریر کے ذریعے یا دکھائی دینے والے خاکے کے ذریعے یا بصورت دیگر وفاق یا صوبائی حکومت کو جو بذریعہ قانون قائم کی گئی ہو، معرض نفرت یا حقارت میں لائے یا لانے کی کوشش کرے یا اس سے انحراف کرے یا اس سے انحراف اطاعت پر اکسائے یا اکسانے کی کوشش کرے تو اسے عمر قید کی سزا دی جائے گی جس پر جرمانے کا اضافہ کیا جا سکتا ہے۔
لاہور ہائی کورٹ کے جسٹس شاہد کریم نے یہ فیصلہ بغاوت کے قانون کو کالعدم قرار دینے کی ایک جیسی درخواستوں کے جواب میں سنایا، تاہم تفصیلی فیصلہ ابھی آنا باقی ہے۔
درخواست گزار نے موقف اپنایا کہ بغاوت کا قانون 1860 میں بنایا گیا جو انگریز دور کی نشانی ہے، بغاوت کا قانون غلاموں کے لیے استعمال کیا جاتا تھا، کسی کے کہنے پر بھی مقدمہ درج کرلیا جاتا ہے۔
درخواست میں مزید کہا گیا کہ آئین پاکستان ہر شہری کو آزادی اظہار رائے کا حق دیتا ہے، بغاوت کے قانون کو اب بھی دفعہ 124 (اے) کے ذریعے سیاسی مقاصد کے لیے استعمال کیا جارہا ہے۔
درخواست میں شہباز گل کے کیس کا حوالہ دیتے ہوئے کہا گیا کہ ان کے خلاف بغاوت کے الزامات کے تحت مقدمہ چلایا جا رہا ہے، اسی طرح پشتون تحفظ موومنٹ (پی ٹی ایم) سے تعلق رکھنے والے محسن داوڑ، علی وزیر سمیت دیگر قانون سازوں کا ذکر کیا گیا، جن کے بارے میں کہا گیا ہے کہ انہیں بھی غداری کے الزامات کی بنیاد پر قانونی کارروائی کا سامنا ہے۔
درخواست میں مزید کہا کہ اس کے علاوہ مختلف نامور صحافی ارشد شریف، خاور گھمن، عدیل راجا اور صدف عبدالجبار کو بغاوت کے الزامات کی بنیاد پر قانونی کارروائی کا سامنا کرنا پڑا جبکہ جاوید ہاشمی کو بھی غداری کے الزام میں 23 سال قید کی سزا سنائی گئی۔
