اسلام آباد(ویب ڈیسک ) چیئر مین پاکستان تحریک انصاف (پی ٹی آئی )عمران خان نے توشہ خانہ کیس میں نیب تحقیقات کے خلاف اسلام آباد ہائی کورٹ سے رجوع کرلیا۔
” پاکستان ٹائم “کے مطابق سابق وزیر اعظم عمران خان نے توشہ خانہ کیس میں نیب تحقیقات کے خلاف اسلام آباد ہائی کورٹ میں درخواست دائر کردی ہے ، جس میں نیب کے 16 مارچ اور 17 فروری کے طلبی کے نوٹس کو چیلنج کیا گیا ہے، عمران خان کی جانب سے ان کے وکیل خواجہ حارث نے درخواست اسلام آباد ہائی کورٹ میں دائر کی ہے جس میں چیئر نیب اور ایڈیشنل ڈائریکٹر نیب راولپنڈی کو فریق بنایا گیا ہے۔
درخواست میں موقف اختیار کیاگیا ہے کہ 17 فروری اور 16 مارچ کے نیب کال اپ نوٹسز غیر قانونی قرار دئیے جائیں، کیس کے حتمی فیصلے تک انکوائری کو انویسٹ گیشن میں تبدیلی کے عمل سے روکا جائے،وکیل نے عمران خان کی جانب سے استدعا کی کہ کال اَپ نوٹسز کی بنیاد پر کسی قسم کی تادیبی کارروائی سے روکا جائے۔
