اسلام آباد (سٹاف رپورٹر ) وفاقی وزیر ماحولیاتی تبدیلی سینیٹر شیری رحمن نے کہا ہے کہ تنازعات کا شکار بنچ عدلیہ کی ساکھ کیلئے ٹھیک نہیں، 9 ارکان پر مشتمل عدالتی بنچ 3 ارکان تک محدود ہوگیا ہے۔
”پاکستان ٹائم“ کے مطابق مائیکرو بلاگنگ ویب سائٹ پر ٹویٹ کرتے ہوئے شیری رحمن کا کہنا تھا کہ بنچ جس طرح تنازعات، تقسیم کا شکار ہے،عدلیہ کی ساکھ اور تاثر کیلئے ٹھیک نہیں،صاف ظاہر ہے یہ بنچ اکثریت اور غیرجانبداری کھو چکا،فیصلے سے پہلے بنچ متنازع ہو جائے تو وہ انصاف نہیں ہوتا۔انہوں نے کہا کہ دوسری طرف حکومت،بار کونسل کی فل کورٹ بنچ کی استدعا پھر مسترد کی گئی ہے،فل کورٹ بنچ کی درخواست مسلسل مسترد ہونے پر کئی سوالات جنم لے رہے ہیں،اعلی عدالت سے گزارش ہے فل کورٹ بنچ کی درخواست پر نظرثانی کرے۔شیریں رحمن کا کہنا تھا کہ یہ صرف حکومت کا نہیں پوری قوم کا مطالبہ ہے،اس بحران کا حل کورٹ کی اجتماعی دانش میں ہے، 3 ججز پر مشتمل بنچ کا فیصلہ عدالتی اجتماعی دانش نہیں ہو سکتا،معزز ججز کو اندرونی تقسیم،تنازع زائل کرنے کیلئے ساتھ بیٹھنا چاہیے،عدالت کو اپنی ساکھ،غیرجانبداری کا تاثر بحال کرنے کا موقع ضائع نہیں کرنا چاہیے۔
