راولپنڈی(وقائع نگار خصوصی)بلوچستان کے ضلع کیچ میں دہشت گردوں کے حملے میں 4 سیکیورٹی اہلکار شہید ہوگئے۔
پاک فوج کے شعبہ تعلقات عامہ آئی ایس پی آر کے مطابق دہشتگردوں نے ضلع کیچ میں پاک ایران بارڈر پر جلگئی سیکٹر میں حملہ کیا گیا جس سے چار مادر وطن کی حفاظت کرتے ہوئے شہید ہو گئے۔آئی ایس پی آر کے مطابق شہید جوانوں میں نائیک شیر احمد، لانس نائیک محمد اصغر، سپاہی محمد عرفان اور سپاہی عبدالرشید شامل ہیں،جلگئی سیکٹر میں پاکستانی سیکیورٹی فورسز کے اہلکار معمول کے گشت پر تھے کہ دہشت گردوں نے اچانک حملہ کر دیا ۔واقعے کے بعد پاکستان نے متعلقہ ایرانی حکام سے رابطہ کر کے ایکشن لینے کا مطالبہ کر کے کہا ہے کہ ایران اپنے علاقے میں دہشت گردوں کے خلاف فوری کارروائی کرے۔کوہلو کے 37 سالہ نائیک شیر احمد نے بیوہ، 3 بیٹیوں اور 2 بیٹوں کو سوگوار چھوڑا، لانس نائیک اصغر علی کا تعلق کوٹ ادو ضلع مظفر گڑھ سے ہے، 34 سالہ لانس نائیک اصغر علی نے سوگواروں میں بیوہ اور 5 بیٹے چھوڑے۔سپاہی عرفان اللہ کا تعلق ضلع ڈیرہ غازی خان سے ہے، 22 سال کے سپاہی عرفان نے بیوہ اور ایک بیٹی کو سوگوار چھوڑا، 24 سال کے سپاہی عبدالرشید کا تعلق ضلع صحبت پور سے ہے۔
