لاہور(وقائع نگارخصوصی)پاکستان تحریک انصاف(پی ٹی آئی) نے سیاسی جماعتوں سے رابطوں کا آغاز کردیا،اسد عمراور اعجاز چوہدری کی منصورہ میں جماعت اسلامی کی قیادت سے ملاقات،پی ٹی آئی کے مرکزی صدر چوہدری پرویز الٰہی کا بھی مختلف جماعتوں کے رہنماوں سے رابطہ،شاہ محمود قریشی بھی سیاسی جماعتوں سے رابطے کے لئے متحرک ہو گئے،منصورہ میں سراج الحق سے ہونے والی ملاقات کی اہم تفصیلات سامنے آ گئیں۔
”پاکستان ٹائم“ کے مطابق امیر جماعت اسلامی سراج الحق سے پاکستان تحریک انصاف(پی ٹی آئی) کے سیکرٹری جنرل اسد عمر اور سینئررہنما اعجاز چودھری نے منصورہ میں ملاقات کی اور ملک کی موجودہ سیاسی صورت حال پر تبادلہ خیال کیا،ڈاکٹر فرید پراچہ،امیر العظیم،اظہر اقبال حسن، محمد اصغر اور قیصر شریف بھی اس موقع پر موجود تھے، دونوں اطراف میں اس امر پر اتفاق پایا گیا کہ موجودہ گھمبیر سیاسی بحران سے نکلنے کا واحد راستہ اسی صورت میں ہے کہ تمام سٹیک ہولڈرز آئین کی مکمل پاسداری کریں۔ملاقات میں ملکی سیاسی صورتحال اور باہمی دلچسپی کے امور پر تبادلہ خیال کیا گیا۔ملاقات میں پاکستان تحریک انصاف اور جماعت اسلامی میں رابطے برقرار رکھنے پر اتفاق
کیا گیا۔پی ٹی آئی سینئر رہنما اور جماعت اسلامی قیادت اس بات پر بھی ہم خیال نظر آئے کہ مسائل سے نکلنے کا واحد راستہ متفقہ آئین اور جمہوری نظام ہے۔سراج الحق نے کہا کہ جماعت اسلامی پورے ملک میں ایک ہی روز انتخابات کی حامی ہے،ہم صاف اور شفاف انتخابات چاہتے ہیں،ہمارا موقف ہے کہ عوام ہی اس ملک کے وارث اور انھیں ہی آخری فیصلہ کرنے کا حق حاصل ہے،سیاسی جماعتوں کو قومی انتخابات کے لیے متفقہ تاریخ پر مذاکرات کا آغاز کرنا چاہیے،سیاست دان آئین و قانون کی بالادستی اور جمہوریت کی مضبوطی اور تسلسل پر اتفاق کریں،دو صوبوں میں الیکشن سے مسائل حل نہیں ہوں گے،انتخابات کے نتائج کو تسلیم نہیں کیا جائے گا،بحران بڑھے گا اور پولرائزیشن میں مزید اضافہ ہو گا۔انھوں نے سیاسی جماعتوں پر زور دیا کہ وہ لڑائیاں ترک کر کے عوامی مسائل کے حل پر توجہ دیں،اس وقت ملک تاریخ کے بدترین معاشی، سیاسی،سماجی اور آئینی بحران سے دوچار ہے،عدالتیں، اسٹیبلشمنٹ، ایوان سمیت تقریباً قومی ادارے خوف ناک تقسیم کا شکار ہیں اور عوام مہنگائی،بدامنی کی چکی میں پس رہے ہیں،سیاست دانوں نے ہوش کے ناخن نہ لیے تو ملک میں بچی کھچی جمہوریت بھی ختم ہو جائے گی اور تیسری پارٹی کو شب خون مارنے کا موقع ملے گا۔
امیر جماعت نے کراچی میں راشن تقسیم کے دوران بھگدڑ کے نتیجے میں ہونے والی شہادتوں پر گہرے دکھ کا اظہار کرتے ہوئے جاں بحق افراد کے لیے دعائے مغفرت اور لواحقین سے ہمدردی کا اظہار اور سانحہ کی شفاف تحقیقات کا مطالبہ کیا۔انھوں نے کہا کہ ریاست اور حکومت اپنی ذمہ داری پوری کرنے میں مکمل ناکام ہو گئے ہیں،اب تک آٹا اور راشن کے حصول کی جدوجہد میں 20جانیں چلی گئیں، سیکڑوں زخمی ہوئے، لائنوں میں پاوں تلے روندے گئے اور ہسپتال پہنچ گئے، کراچی سمیت پورے سندھ میں لوگ غربت اور بے روزگاری کے ہاتھوں تنگ ہیں، صوبے پر 15برس سے مسلط جماعت نے عوام کی بہتری کے لیے کوئی اقدام نہیں اٹھایا،حال ہی میں کراچی میں بلدیاتی انتخابات میں دھاندلی کی گئی،اس کے باوجود شہر نے جماعت اسلامی پر اعتماد کیا مگر اب الیکشن کمیشن بلدیاتی انتخابات کے عمل کو مکمل نہیں کر رہا اور صوبے کی حکمران جماعت کے دباو میں لیت و لعل سے کام لے کر ملک کے سب سے بڑے شہر اور معاشی شہ رگ کو شہری حکومت سے محروم کر رکھا ہے۔
دوسری طرف عمران خان کی ہدایت پر پی ٹی آئی کے مرکزی صدر چوہدری پرویز الٰہی نے بھی مختلف جماعتوں کے رہنماوں سے رابطہ کرتے ہوئے متحدہ قومی موومنٹ( ایم کیو ایم)پاکستان کے رہنماوں ڈاکٹرخالد مقبول صدیقی، مصطفی کمال اور وسیم اختر سے ٹیلیفونک رابطہ کیا اور موجودہ صورتحال پر تبادلہ خیال کیا۔چوہدری پرویز الٰہی نے عوامی تحریک کے حسن محی الدین اورخرم نواز گنڈا پور کو بھی فون کیا جبکہ اسلامی جمہوری اتحاد کے سربراہ علامہ زبیر احمد ظہیر سے بھی ٹیلی فونک رابطہ کیا۔سابق وزیر اعلیٰ نے تمام رہنماوں سے ملکی سیاسی صورتحال پر تبادلہ خیال کیا اور سپریم کورٹ میں پی ٹی آئی کی درخواست پر بھی مشاورت کی۔شاہ محمود قریشی نے اسلام آباد میں مجلس وحدت المسلمین کی قیادت سے ملاقات کی۔علامہ راجہ ناصر عباس سے شاہ محمود قریشی کی ملاقات میں پاکستان کی موجودہ سیاسی صورتحال اور سپریم کورٹ میں جاری الیکشن کیس سے متعلق تبادلہ خیال کیا گیا۔شاہ محمود قریشی کا کہنا ہے کہ نوازشریف نے گزشتہ روز دھمکی دیتے ہوئے کہا کہ عدالت کے فیصلے قبول نہیں کریں گے، انتخابات سے متعلق سپریم کورٹ میں پیر کو دوبارہ سماعت ہوگی،کیس میں طے کیا جانا ہے کہ نوے دن میں انتخابات کس نے اور کیسے کرانے ہیں۔
