لاہور(وقائع نگار خصوصی)پاکستان تحریک انصاف(پی ٹی آئی) کے چیئرمین عمران خان نے کہا ہے کہ جنرل(ر)قمر جاوید باجوہ نے مجھ پر بھارت سے دوستی کے لیے دباؤ ڈالا،باجوہ کے خلاف فوج کے اندر سے احتساب ہونا چاہئے،90 روز میں الیکشن نہ ہوئے تو ہم سڑکوں پر نکلیں گے۔
”پاکستان ٹائم“ کے مطابق صحافیوں سے گفتگو کرتے ہوئے سابق وزیر اعظم پاکستان عمران خان نے کہا کہ باجوہ بھارت سے دوستی چاہتا تھا اس کے لیے مجھ پر دباؤ بھی ڈالا گیا،جنرل باجوہ ایک روز کچھ کہتا ہے اور دوسرے روز اس بات سے مکر جاتا ہے،ان کے خلاف احتساب فوج کے اندر سے ہونا چاہیے۔عمران خان نے کہا کہ میرے گھر پر میری غیر موجودگی میں جو حملہ کیا گیا،اس کا کوئی جواز نہیں تھا،گھر پر حملے کے حوالے سے کیس تیار کر لیا ہے،جلد ہی فائل کر دیا جائے گا۔انھوں نے کہا کہ صدر مملکت ڈاکٹر عارف علوی اب اسٹیبلشمنٹ اور ہمارے درمیان کسی بھی قسم کا کردار ادا نہیں کر رہے،شاہ محمود قریشی اور پرویز الٰہی کو دیگر جماعتوں سے رابطے بحال کرنے کا ٹاسک دیا ہوا ہے،90 روز میں الیکشن نہیں کروائے گئے تو ہم سڑکوں پر نکلیں گے،نگران حکومت کو نیوٹرل کا کردار ادا کرنا چاہیے تھا جو وہ ادا نہیں کر رہی،محسن نقوی،آئی جی پنجاب،سی سی پی او لاہور جرائم پیشہ افراد ہیں،میڈیا پر ہمارا مکمل بلیک آؤٹ کیا گیا ہے، سوشل میڈیا کو بھی کنٹرول کرنے کی کوشش کر رہے ہیں۔عمران خان کا کہنا تھا کہ کس قانون کے تحت یہ لوگ توڑی گئی پنجاب اور کے پی کے اسمبلیاں بحال کریں گے؟سپریم کورٹ نے پہلے سوموٹو کے ذریعے اسمبلیاں بحال کیں تو سوموٹو ٹھیک تھا،اب سوموٹو کے ذریعے الیکشن چاہ رہا ہے تو یہ لوگ سوموٹو کے پیچھے پڑ گئے۔
