اسلام آباد(سٹاف رپورٹر)پاکستان پیپلزپارٹی کے رکن قومی اسمبلی عبدالقادر مندوخیل نے رانا ثناء اللہ اوراسحاق ڈار کو آڑے ہاتھوں لیتے ہوئے مطالبہ کیا ہے کہ وزارت خزانہ اور وزارت داخلہ کسی اور اتحادی کو دے دی جائیں،رانا ثناء اللہ سے ایک آدمی(عمران خان)نہیں سنبھالا جا رہا،ایٹمی اثاثوں کے حوالے سے بیان دینے پر اسحاق ڈار کے خلاف انکوائری کی جائے،اچھا ہے کہ نواز شریف واپس نہ آئیں کیونکہ پیپلز پارٹی تو آگے بڑھ رہی ہے۔
”پاکستان ٹائم “ کے مطابق پیپلزپارٹی کے رکن قومی اسمبلی عبدالقادر خان مندوخیل رانا ثنااللہ ، اسحاق ڈار اور مریم نواز پر برس پڑے اورکہا کہ وزارت داخلہ اور خزانہ ن لیگ سے نہیں چل رہی تو کسی اور پارٹی کو دے دیں،رانا ثنا اللہ تھوڑا تگڑے ہو جاو¿،تم سے ایک آدمی(عمران خان) نہیں سنبھالا جارہا، راناثناءاللہ نے عمران خان کے معاملے کو مس ہینڈل کیا، آئی جی پنجاب کو بھی سزا ملنی چاہیے۔ن لیگی چیف آرگنائزر پر تنقید کرتے ہوئے عبدالقادر مندوخیل نے کہا کہ مریم نواز ن لیگ کی چیف آرگنائزر،چچا وزیر اعظم اور پارٹی سربراہ ہیں، پھر بھی مریم نواز کہیں کہ یہ ان کی حکومت نہیں تو عوام بیوقوف نہیں بن سکتے،مریم نواز پارٹی عہدے سے استعفیٰ دیکر کہیں کہ ان کی حکومت نہیں۔پیپلز پارٹی رہنما نے ایٹمی اثاثوں سے متعلق بیان پر اسحاق ڈار کیخلاف انکوائری کا مطالبہ کرتے ہوئے کہا سب کچھ آئی ایم ایف کے سامنے رکھ دیا پھر ڈار نے ایٹمی اثاثوں کی بات کیسے کی؟جیالے گردنیں کٹوادیں گے لیکن ایٹمی اثاثوں پر سمجھوتا نہیں ہونے دیں گے،اسحاق ڈار کو کسی نے بولا ہے تو نام بتائیں،عمران خان کی طرح سائفر نہ بنائیں،بطور وزیر خزانہ اتنی غلط گفتگو کیسے کر لیتے ہیں؟اسحاق ڈار مفتاح کیخلاف بول رہا تھا،آج مفتاح ڈار کیخلاف بول رہاہے،مفتاح تو اسحاق ڈار کے معاملے پر نواز شریف کے گھر تک پہنچ گیا،مفتاح سے کچھ نہیں پوچھیں گے کیونکہ وہ شہباز شریف کا فیکٹری پارٹنر ہے،میں تحریک انصاف پر پابندیوں کے حق میں نہیں،ان کا سیاسی مقابلہ ہونا چاہیے،نواز شریف کی واپسی کے سوال پر عبدالقادر مندوخیل کا کہنا تھا کہ اچھا ہے نوازشریف واپس نہ آئیں کیونکہ پیپلز پارٹی تو آگے بڑھ رہی ہے،آصف زرداری تو بیماری میں بھی دورے کر کے لوگوں کو مل رہے ہیں۔
