لاہور(کورٹ رپورٹر)پاکستان تحریک انصاف (پی ٹی آئی) کے سوشل میڈیا ہیڈ اظہر مشوانی نے بازیابی کے بعد لاہور ہائیکورٹ میں سنسنی خیز انکشافات کردیے۔
”پاکستان ٹائم“ کے مطابق لاہور ہائیکورٹ کی جسٹس عالیہ نیلم نے اظہر مشوانی کی بازیابی سے متعلق درخواست پر سماعت کی۔ درخواست گزار کے وکیل نے عدالت کو بتایا کہ مغوی کو نامعلوم افراد اسلام آباد چھوڑ کر چلے گئے، بازیابی کے بعد اظہر مشوانی ذہنی طور پر کافی دباو میں ہیں۔عدالت نے اظہر مشوانی سے استفسار کیا کہ آپ کو کس نے اغوا کیا تھا؟جس پر انھوں نے جواب دیا کہ مجھے علم نہیں، وہ لوگ میرے سامنے جب آتے تو نقاب پہنے ہوئے ہوتے تھے، نقاب پہن کر آنے والے اپنے آپ کو ایف آئی اے کے ملازم ظاہر کر رہے تھے، کہتے تھے کہ ایسا کرنے کیلئے رانا ثناءاللہ اور ڈی جی کی طرف سے ہدایات دی گئی ہیں،مجھے اٹھانے اور تفتیش کرنے والے کہتے رہے تمہیں رانا ثنا اللہ اور ڈی جی ایف آئی اے کے کہنے پر اٹھایا، میں بار بار کہتا رہا مجھے کورٹ میں پیش کریں لیکن مجھے کہا جاتا تم مغوی رہو گے، پورے پاکستان میں کیسز بھگتو گے،۔عدالت نے اظہر مشوانی کو پولیس کے پاس جاکر بیان ریکارڈ نہ کروانے پر ناراضگی کا اظہار کیا اور انھیں کہا کہ آپ کو بازیابی کے بعد پولیس کے سامنے پیش ہونا چاہیے تھا، سب سے پہلے شکایت پولیس کے پاس درج کروائی جاتی ہے۔لاہور ہائیکورٹ نے پی ٹی آئی کے سوشل میڈیا ہیڈ اظہر مشوانی کی بازیابی کے بعد درخواست نمٹا دی۔
