اسلام آباد(وقائع نگار خصوصی)سپریم کورٹ کے جج جسٹس مظاہرعلی اکبر نقوی کیخلاف ریفرنس دائر کر دیا گیا۔
سرکاری ٹی وی کے مطابق ریفرنس بلوچستان بارکونسل کی جانب سے سپریم جوڈیشل کونسل میں دائر کرتے ہوئے کہا گیا ہے کہ معزز جج کے حوالے سے سامنے آنے والی آڈیوز نہایت اہمیت کی حامل ہیں،آڈیوز میں جج کے سامنے کیس مقرر کرنے پر زور دینے سے جج کے وقار پر اثر ہوا،تمام شواہد اور حالات جج کی شہرت کو نقصان پہنچاتے ہیں،جج کے بیٹے لاہور میں وکالت کر رہے ہیں،معززجج ا تھارٹی کا غیر قانونی استعمال کرتے ہوئے بیٹوں کی سرپرستی کر رہے ہیں،معزز جج کی ہی وجہ سے ان کے بیٹوں کو ہائی پروفائل مقدمات میں وکیل مقرر کیا جاتا ہے،معزز جج نے آمدن سے زائد اثاثہ جات بھی بنا رکھے ہیں۔ریفرنس میں مطالبہ کیا گیا ہے کہ عوام اور بارز کے اعتماد کیلئے معزز جج کو عہدے سے ہٹایا جائے،آئین اور قانون کے مطابق جج کے خلاف کارروائی کی استدعا کی گئی ہے۔
دوسری طرف جسٹس مظاہر علی اکبر نقوی کیخلاف ریفرنس دائر ہونے کے بعد جسٹس قاضی فائز عیسیٰ اور جسٹس سردار طارق مسعود نے چیف جسٹس عمر عطا بندیال کوخط لکھتے ہوئے تحقیقات کیلئے سپریم جوڈیشل کونسل کا اجلاس بلانے کا مطالبہ کر دیا ہے۔یاد رہے کہ اس سے قبل سابق وزیر اعظم عمران خان پر حملہ کرنے والے ملزم کے وکیل میاں داود ایڈووکیٹ نے بھی جسٹس مظاہر علی اکبر نقوی کیخلاف سپریم جوڈیشل کونسل میں ریفرنس دائر کیا تھا۔
