لاہور(وقائع نگار خصوصی)پاکستان پیپلز پارٹی کے رہنما اور معروف قانون دان بیرسٹر اعتزاز احسن نے کہا ہے کہ جنہوں نے سیکیورٹی دینی ہے وہی الیکشن نہ کروانے کی کوشش میں ہیں، پہلی بار دیکھ رہے ہیں کہ آئین پر عمل درآمد نہیں ہورہا، حکومت زبردستی کررہی ہے، اسحاق ڈار کہتے ہیں پیسے نہیں جبکہ ان کے اپنے اثاثے باہر پڑے ہیں، اسحاق ڈار کے اثاثے ڈالرز میں ہیں، ڈالر اوپر جاتا ہے تو اسحاق ڈار بھی اوپر جاتا ہے لیکن ملک نیچے جاتا ہے۔
”پاکستان ٹائم“ کے مطابق اسلام آباد میں لائرز کنونشن سے ویڈیو لنک کے ذریعے خطاب کرتے ہوئے اعتزاز احسن نے کہا کہ 90 دن میں انتخابات آئین کا تقاضہ ہے، پہلی بار دیکھ رہے ہیں آئین پر عمل درآمد نہیں ہو رہا، حکومت زبردستی کر رہی ہے، پوری قوم اور وکلاءاپنے چیف جسٹس عمر عطا بندیال کے ساتھ کھڑے ہیں، پوری قوم کی نظریں سپریم کورٹ پر ہیں، نظریہ ضرورت کب تک استعمال ہوگا؟۔ بیرسٹر اعتزاز احسن نے کہا کہ رینجرز تو رانا ثناءاللہ کے ماتحت ہے، وہ کیسے رینجرز کو اجازت دے گا، ایک بندہ آپ کا عدالت سے فراڈ کرکے بھاگا ہوا ہے، ماضی میں میاں خاندان کی ایک جج کو دی ہوئی ڈکٹیشن ریکارڈ پر ہے، جسٹس منیر کی وراثت نظریہ ضرورت ہے جس کی وجہ سے مارشل لا لگے، آئین کہتا ہے 90 دن میں انتخابات کروائیں، 91ویں دن نگراں حکومت صفر ہو جائے گی، 1971 میں یحییٰ خان نے جب الیکشن موخر کیے تو بنگلہ دیش بنا اورملک ٹوٹ گیا، پنجاب اور خیبر پختونخوا میں الیکشن نہ کروانے کے لیے کوششیں جاری ہیں۔
