راولپنڈی(وقائع نگار خصوصی ) وفاقی وزیر داخلہ اور پاکستان مسلم لیگ ن کے رہنما رانا ثنا اللہ خان نے کہا ہے کہ ایک شخص کی ہٹ دھرمی کسی صورت قبول نہیں کریں گے، الیکشن ضرور ہوں گے لیکن اپنے وقت پر ہوں گے۔
”پاکستان ٹائم “ کے مطابق راولپنڈی میں وکلا کنونشن سے خطاب کرتے ہوئے وزیر داخلہ رانا ثنا اللہ نے کہا کہ ہم الیکشن سے گھبرانے والے نہیں،جن الیکشنز پر سیاسی جماعتوں،الیکشن کمیشن اور باقی اداروں کا اتفاق نہیں تو وہ کیسے ہو سکتے ہیں؟متنازع طریقے سے الیکشن کرانے کی کوشش کی جا رہی ہے،متنازع الیکشن ملک کی تباہی کا باعث بنے گا،ہم اس کے سخت خلاف ہیں،ہم ہمیشہ ووٹ کی طاقت سے اقتدار میں آئے سیلیکٹ نہیں ہوئے،الیکشن سے گھبراتے نہیں لیکن ان الیکشن میں سیاسی جماعتوں اور ججز میں بھی اتفاق نہیں۔
انہوں نے کہا کہ یہ متنازعہ الیکشن ملک کو انارکی کی طرف لے جائے گا،اس سے پہلے 1971 اور 77 کے الیکشن بھی متنازعہ تھے ایک نے ملک توڑا دوسرے نے دہشت گردی دی،یہ تیسرا الیکشن اگر متنازع انداز سے ہوگیا تو ملک کی تباہی، افراتفری و انارکی کا راستہ بنے گا،ہم اس تباہی کے سخت خلاف ہیں،اس موقف کو سپریم کورٹ ججز کی اکثریت تسلیم کرتی ہے،ضد اور ہٹ دھرمی کے الیکشن کسی صورت قبول نہیں،انتخابات اپنے وقت پر تمام سٹیک ہولڈرز کی مرضی سے ہونے چاہئیں۔
