راولپنڈی(وقائع نگار خصوصی)سیکیورٹی فورسز کو ملک دشمنوں کے خلاف بڑی کامیابی ملی ہے، پاک وطن کے محافظ جوانوں نے جنوبی وزیرستان کے علاقے شنوارسک میں آپریشن کرکے 8 دہشت گردوں کو ہلاک کر دیا جبکہ ملک دشمنوں سے لڑتے ہوئے ایک اہلکار وطن کی مٹی پر قربان ہو گیا۔
پاک فوج کے شعبہ تعلقات عامہ (آئی ایس پی آر) کے مطابق فورسز نے جنوبی وزیرستان کے علاقے شنوارسک میں انٹیلی جنس بیسڈ آپریشن کیا،آپریشن کے دوران سیکیورٹی اہلکاروں اور دہشت گردوں کے درمیان شدید فائرنگ کا تبادلہ ہوا، فائرنگ کے تبادلے میں دہشت گرد کمانڈر جان محمد عرف چراغ سمیت 8 دہشت گرد مارے گئے،ہلاک دہشت گردوں سے اسلحہ اور گولہ بارود بھی برآمد کرلیا گیا،مارے گئے دہشت گرد سیکورٹی فورسز کے خلاف دہشت گردی کی کارروائیوں اور بے گناہ شہریوں کے قتل میں ملوث تھے۔
آئی ایس پی آر کے مطابق آپریشن کے دوران شدید فائرنگ کے تبادلے میں راولپنڈی کے 31 سالہ سپاہی حامد رسول بہادری سے لڑتے ہوئے شہید ہوگئے،جب کہ دو افسران سمیت چار اہلکار زخمی ہوئے۔آئی ایس پی آر کا کہنا ہے کہ سکیورٹی فورسز دہشت گردی کی لعنت کو ختم کرنے کے لئے پر عزم ہیں اور بہادر سپاہیوں کی یہ قربانیاں ہمارے عزم کو مزید مضبوط کرتی ہیں۔
