وزیرآباد(وقائع نگار)وزیرآباد حملہ کیس کی تفتیش میں اہم کردار اور مدعی مقدمہ ایس ایچ او عامر شہزاد بھدر انتقال کر گئے۔
”پاکستان ٹائم“ کے مطابق پاکستان تحریک انصاف(پی ٹی آئی) کے چیئرمین عمران خان پر وزیر آباد میں قاتلانہ حملے کے واقعے میں مقدمے کے مدعی ایس ایچ او عامر شہزاد کا انتقال ہو گیا،عامر شہزاد بھدر کو ہارٹ اٹیک ہوا،انھیں ہسپتال لے جایا گیا تاہم دل کا دورہ جان لیوا ثابت ہوا۔ایس ایچ او عامر شہزاد کی نماز جنازہ آج بعد از نماز تراویح رات 10:00 بجے بھدر جنازہ گاہ میں ادا کیا جائے گا۔یاد رہے کہ چیئرمین پی ٹی آئی پر حملہ کی ایف آئی آر عامر بھدر کی مدعیت میں ہی درج ہوئی،پی ٹی آئی کی جانب سے ان پر حملہ کی ایف آئی آر بر وقت درج نہ کرنے کا بھی الزام تھا،عامر بھدر عمران خان پر حملے کے کیس کی تفتیش میں اہم کردار تھے۔چیئرمین پی ٹی آئی عمران خان پر وزیر آباد میں جب حملہ ہوا تو عامر شہزاد ان دنوں ایس ایچ او صدر وزیر آباد تھے،عمران خان پر حملے کا مقدمہ عامر شہزاد بھدر کے بیان پر سٹی وزیر آباد تھانے میں درج کیا گیا تھا۔پاکستان تحریک انصاف کے چیئرمین عمران خان پر گزشتہ سال ریلی کے دوران حملہ کیا گیا تھا،تین نومبر 2022 کو وزیر آباد سے گزرتے ہوئے پی ٹی آئی کے حقیقی آزادی مارچ کے کنٹینر پر فائرنگ کے نتیجے میں عمران خان اور پی ٹی آئی رہنماوں سمیت 14 افراد زخمی ہو گئے تھے جبکہ معظم نامی ایک شخص جاں بحق ہو گیا تھا۔
