اسلام آباد(وقائع نگار خصوصی)وزیر اعظم شہباز شریف کی زیر صدارت وفاقی کابینہ کا اجلاس الیکشن کمیشن کو فنڈز فراہمی کے حوالے سے کسی نتیجے کے بغیر ختم ہو گیا،وزیر اعظم شہباز شریف کا کہنا تھا کہ پارلیمنٹ سے منظورہ شدہ سپریم کورٹ پریکٹس اینڈ پروسیجر بل صدر مملکت کی جانب سے واپس بھجوانا بدقسمتی ہے۔
”پاکستان ٹائم“ کے مطابق وزیراعظم شہبازشریف کی زیرِ صدارت وفاقی کابینہ کا اجلاس ہوا، جس میں شہباز شریف نے ویڈیو لنک کے ذریعے صدارت کی اور اجلاس دو گھنٹے جاری رہا۔وفاقی کابینہ اجلاس میں ملکی معاشی و سیاسی صورتحال پر غور ہوا۔الیکشن کمیشن کو فنڈز کی فراہمی پر فیصلہ نہ ہوسکا،الیکشن کمیشن کو فنڈز کی فراہمی کامعاملہ پارلیمنٹ میں لے جانے پر اتفاق ہوا ہے،وفاقی کابینہ نے معاملے پر پارلیمنٹ سے رائے لینے کا فیصلہ کیا ۔وفاقی کابینہ نے کہا ہے کہ پارلیمنٹ سپریم ہے جوچاہے فیصلہ کرے۔اجلاس میں پارلیمنٹ کی بالادستی قائم رکھنے پر اتفاق کیا گیا۔اجلاس میں موجودہ ملکی سیاسی صورتحال کا جائزہ لیا گیا، جب کہ سپریم کورٹ پریکٹس اینڈ پروسیجر بل کو واپس بھجوانے اور صدر مملکت کے کردار کی مذمت کی گئی۔اس موقع پر وزیراعظم شہبازشریف کا کہنا تھا کہ صدر کا کردار پی ٹی آئی کے ایک کارکن جیسا ہو چکا ہے، پارلیمنٹ سے منظور شدہ بل واپس بھجوانا بدقسمتی ہے، صدر کو آئین و قانون کی پاسداری کرنی چاہئے۔ن لیگی ذرائع کے مطابق وفاقی کابینہ کے اجلاس میں پنجاب انتخابات کے لئے فنڈز جاری کرنے کا فیصلہ نہیں ہوسکا، کابینہ سپریم کورٹ کے دو فیصلوں پر تذبذب کا شکار ہے۔ اجلاس میں اراکین کی جانب سے ملک بھر میں ایک ہی دن انتخابات کروانے پر زور دیا گیا، اور الیکشن کمیشن کو فنڈز جاری کرنے یا نہ کرنے کے لئے مشاورت کو وسیع کرنے کا فیصلہ کیا گیا، کابینہ کے بعض ارکان کا مشورہ تھا کہ آدھے فنڈز جاری کر دئیے جائیں، کیوں کہ فنڈز جاری ہونے سے سپریم کورٹ کی حکم عدولی نہیں ہوگی۔کابینہ نے کل کے پارلیمنٹ کے مشترکہ اجلاس میں عدالتی اصلاحات بل پر مشاورت کی، اور کابینہ نے پارلیمانی پارٹی کے کل مشترکہ اجلاس میں شرکت کی یقینی بنانے کا کہا گیا۔وزیراعظم شہبازشریف نے وفاقی کابینہ کا اجلاس کل پھر طلب کرلیا ہے، اجلاس کل صبح ساڑھے 10 بجے ہوگا جس میں پارلیمنٹ کے مشترکہ اجلاس اور انتخابات کیلئے فنڈز فراہمی معاملہ پر غور ہوگا۔
