لاہور(سٹاف رپورٹر)رمضان المبارک کے دوسرے عشرے کا اختتام ہوگیا،تیسرا عشرہ شروع ہوتے ہی لاکھوں فرزندان اسلام اعتکاف میں بیٹھ گئے ہیں،لاکھوں فرزندان توحید نے نماز مغرب مساجد میں ادا کرنے کے بعد اعتکاف شروع کیا اور نماز تراویح کے بعد تلاوت قرآن اور اذکار میں مشغول ہو گئے ہیں،مساجد سے اللہ کے ذکر کی صدائیں بلند ہونا شروع ہو گئی ہیں۔
”پاکستان ٹائم“ کے مطابق رمضان المبارک کا تیسرا عشرہ شروع ہوگیا،ملک کے مختلف شہروں میں نماز عصر کے بعد فرزندان اسلام نے اعتکاف میں بیٹھنے کے لئے مساجد کا رخ کیا اور افطاری کے بعد باقاعدہ اعتکاف شروع کردیا۔معتکفین روتے،گڑگڑاتے،آنسو بہاتے اپنے گناہوں کی معافی کی دعاوں کے ساتھ ملک کی سلامتی،خوشحالی اور ترقی کے لئے بھی دعائیں مانگیں گے۔رمضان المبارک کی بابرکت گھڑیاں اور آخری عشرے میں خصوصی عبادات اور جہنم سے آزادی کی دعاوں کے ساتھ صوبائی دارالحکومت لاہور کی چھوٹی بڑی مساجد میں لاکھوں فرندان اسلام اعتکاف کی سعادت حاصل کرنے مساجد میں پہنچ گئے۔لارنس روڈ پر واقع جامعہ علامہ احسان الٰہی ظہیرؒ شہید،جامع مسجد علی ہجویریؒ ، جامع منہاج القرآن،بادشاہی مسجد،جامعہ اشرفیہ،جامعہ القادسیہ،جامعہ اہلحدیث دالگراں چوک،جامع مسجد تقویٰ وفاقی کالونی،جامعہ منظور الاسلامیہ عید گاہ کینٹ،جامعہ قاسمیہ،جامعہ عثمانیہ،جامع مسجد شان اسلام،جامعہ حنفیہ لبرٹی مارکیٹ،جامع مسجد مینار الہدیٰ گلبرگ،جامع مسجد رضوان غالب مارکیٹ،جامع رحمانیہ ماڈل ٹاون،جامع مسجد الفتح مکہ کالونی،جامع مسجد محمدیہ رضویہ،جامع فاروقیہ،جامعہ حقانیہ سمیت ہزاروں مساجد میں لاکھوں فرزندان توحید اعتکاف بیٹھ گئے۔حضرت علی ہجویریؒ مسجد میں 1700 شہری اعتکاف میں بیٹھ گئے جبکہ منہاج القرآن میں 6000 افراد سنت اعتکاف کی سعادت حاصل کر رہے ہیں جبکہ بادشاہی مسجد میں بھی 6000 شہری اعتکاف میں بیٹھ گئے۔وفاقی دارالحکومت کی مرکزی فیصل مسجد میں بھی 450 کے قریب افراد اعتکاف کی سعادت حاصل کر رہے ہیں۔معتکفین کا کہنا ہے کہ اعتکاف کرنا ویسے ہی اجر کا کام ہے لیکن فیصل مسجد میں اعتکاف کرنا بڑی سعادت کی بات ہے۔فیصل مسجد انتظامیہ کا کہنا ہے کہ رجسٹریشن کا عمل مکمل کرنے اورجانچ پڑتال کے بعد ساڑھے چار سو افراد کیلئے اعتکاف کیلئے انتظامات کیے گئے ہیں۔تمام مساجد کی طرح فیصل مسجد میں بھی سیکورٹی کے خصوصی انتظامات کیے گئے ہیں۔کراچی میں فیضان مدینہ اور میمن مسجد سمیت دیگر مساجد میں بھی ہزاروں افراد سنت اعتکاف کی سعادت حاصل کررہے ہیں۔مساجد میں شب قدر کی تلاش میں طاق راتوں میں خصوصی عبادات کا سلسلہ شروع ہوگیا ہے۔وفاقی دارالحکومت اسلام آباد،لاہور اور کراچی سمیت دیگر شہروں میں جہاں اجتماعی اعتکاف کیا جا رہا ہے وہاں سیکیورٹی کے خصوصی انتظامات کیے گئے ہیں۔
