اسلام آباد(کورٹ رپورٹر)سپریم کورٹ نے پنجاب میں انتخابات کے لئے فنڈز کی عدم فراہمی پر اٹارنی جنرل، گورنرسٹیٹ بینک، سیکرٹری خزانہ اور سیکرٹری الیکشن کمیشن کو نوٹس جاری کردیئے ہیں۔
”پاکستان ٹائم“ کے مطابق سپریم کورٹ نے پنجاب میں انتخابات کیلئے فنڈز کی عدم فراہمی پر اٹارنی جنرل، گورنر سٹیٹ بینک، سیکریٹری خزانہ اور سیکریٹری الیکشن کمیشن کو نوٹس جاری کرتے ہوئے کہا ہے کہ الیکشن کمیشن کی رپورٹ کے مطابق وفاقی حکومت نے فنڈز فراہم نہیں کئے، عدالتی حکم عدولی کے نتائج قانون میں واضح اور سب کو معلوم ہیں۔نوٹس میں کہا گیا ہے کہ الیکشن کمیشن کی رپورٹ کے مطابق وفاقی حکومت نے فنڈز فراہم نہیں کئے، فنڈز کی عدم فراہمی عدالتی احکامات کی حکم عدولی ہے، عدالتی حکم عدولی کے نتائج قانون میں واضح اور سب کو معلوم ہیں۔چیف جسٹس عمر عطاءبندیال نے تمام افسران کو 14 اپریل کو چیمبر میں طلب کرلیا۔ نوٹس میں یہ بھی کہا گیا ہے کہ الیکشن کیلئے فنڈز کی فراہمی توہین عدالت کی کارروائی سے زیادہ اہم ہے۔عدالت عظمیٰ نے گورنر اسٹیٹ بینک کو دستیاب وسائل سے متعلق تمام تفصیلات اور سیکریٹری خزانہ کو بھی تمام ریکارڈ ساتھ لانے کی ہدایت کردی۔ نوٹس میں تمام فریقین سے مزید کہنا ہے کہ بتایا جائے کہ سپریم کورٹ کے احکامات پر عمل کیوں نہیں کیا گیا۔سپریم کورٹ نے سیکرٹری الیکشن کمیشن کو پنجاب اور خیبرپختونخوا انتخابات کے حوالے سے تمام ریکارڈ بھی فراہم کرنے کا حکم دیدیا۔سپریم کورٹ کا نوٹس میں یہ بھی کہنا ہے کہ عدالتی حکم عدولی کرنے اور اس پر اکسانے والوں کیخلاف کارروائی ہو سکتی ہے، بروقت انتخابات نہ کروانا آئین کو خطرے میں ڈالنا ہے، انتخابات جیسے اہم ترین معاملے پر فنڈ جاری نہ کرنا فوری توجہ کا طلبگار ہے۔سپریم کورٹ نے مزید کہا ہے کہ گورنر سٹیٹ بینک حکومت کے پاس موجود تمام تر پیسے کی تفصیلات ہمراہ لائیں، عدالتی احکامات پر من و عن عملدرآمد یقینی بنایا جائے۔سپریم کورٹ نے 4 اپریل کو اپنے فیصلے میں پنجاب میں 14 مئی کو انتخابات کرانے کا حکم دیا تھا، اور وفاقی حکومت کو حکم دیا کہ وفاقی حکومت کو 10 اپریل تک21 ارب روپے جاری کرے اور الیکشن کے لئے ہر ممکن سہولیات فراہم کرے۔ سپریم کورٹ نے الیکشن کمیشن کو 11 اپریل کو فنڈز ملنے یا نہ ملنے کے حوالے سے رپورٹ پیش کرنے کی ہدایت کی تھی اور گزشتہ روز پنجاب اسمبلی الیکشن کے انتظامات کے لئے درکار 21 ارب روپے فنڈز سے متعلق الیکشن کمیشن حکام نے رجسٹرار سپریم کورٹ کے دفتر میں سربمہر رپورٹ جمع کرائی تھی ۔
