مظفر آباد(وقائع نگار خصوصی)سپریم کورٹ آزاد کشمیر نے سابق وزیر اعظم سردار تنویر الیاس خان کی وزارت عظمی کے عہدے پر فوری بحالی کی درخواست مسترد کر دی۔
”پاکستان ٹائم“ کے مطابق سپریم کورٹ نے سردار تنویر الیاس خان کی آزاد کشمیر ہائیکورٹ کے نا اہلی کے فیصلے کے خلاف اپیل کی سماعت ہوئی،آزاد کشمیر سپریم کورٹ کے چیف جسٹس راجہ سعید اکرم کی سربراہی میں فل بینچ نے سابق وزیر اعظم سردار تنویر الیاس کی اپیل پر سماعت کی،جسٹس رضا علی خان اور جسٹس خواجہ نسیم بھی بینچ میں شامل تھے۔سردارتنویر الیاس خان کی جانب سے لیگل ٹیم کی قیادت ایڈووکیٹ رازق خان نے کی ۔مختصر سماعت کے بعد یکطرفہ کارروائی کرتے ہوئے سپریم کورٹ نے ہائی کورٹ کی سزا پر حکم امتناع جاری کرنے کی درخواست مسترد کر دی۔چیف جسٹس نے ریمارکس دیتے ہوئے کہا کہ سابق وزیر اعظم نے معذرت نہیں کی،سردار تنویر الیاس نے کہا اگر توہین ہوئی ہے تو معافی مانگتا ہوں،سابق وزیر اعظم ایوان اور وزارت عظمیٰ کا عہدہ بھی جوتی کی نوک پر رکھتے ہیں،وہ کہتے ہیں ججز کو نکال دوں گا،سابق وزیر اعظم ایک چپڑاسی کو بغیر پراسس کے نہیں نکال سکتے،اسمبلی قانون بناتی ہے ہم صرف اس کی تشریح کرتے ہیں۔
سابق وزیراعظم سردار تنویر الیاس کے وکیل نے دلائل دیتے ہوئے کہا کہ میرے موکل کو وضاحت کا موقع نہیں دیا گیا، آئین ہر شہری کو خود پر لگے الزامات کا جواب دینے کا موقع دیتا ہے۔آزاد کشمیر سپریم کورٹ کے چیف جسٹس نے ریمارکس دیتے ہوئے کہا کہ ملٹی میڈیا پر ان کے تمام الفاظ چلائے تو انہوں نے تسلیم کیا،انہوں نے عدالت کے سامنے ہی توہین آمیز الفاظ کو تسلیم کیا،ان کے تسلیم کر لینے کے بعد کیا عدالت ان سے معافی مانگتی؟سردار تنویر الیاس نے کہاکہ اگر یہ توہین ہے تو معذرت کرتے ہیں،وہ ویسے بڑے سٹیٹ فارورڈ ہیں،مان لیا کہ انہوں نے ہی یہ کہا،جج بھی کوئی ایسا کام کرتا ہے تو اس کے خلاف بھی توہین کی کارروائی ہو سکتی ہے،جب ایک شخص تسلیم کر لیتا ہے کہ الفاظ بھی اسی کے ہیں اور توہین بھی کی ہے تو ہمارے پاس کیا آپشن رہ جاتا ہے؟ہم اس وقت اپیل نہیں سن رہے،ہم ابھی یہ سماعت کر رہے ہیں کہ یہ اپیل قابل سماعت بھی ہے یا نہیں۔
واضح رہے کہ گزشتہ روز آزاد کشمیر ہائیکورٹ نے توہین عدالت کیس میں سردار تنویر الیاس کو وزارت عظمیٰ کے لئے نااہل قرار دیا تھا۔آزاد کشمیر کی تاریخ میں پہلی بار کسی وزیرِ اعظم کو توہین عدالت پر نااہل قرار دیا گیا ہے۔توہین عدالت کیس میں سردار تنویر الیاس خان کی نااہلی کے بعد سینئر وزیر خواجہ فاروق قائم مقام وزیر اعظم بنایا گیا ہے۔ نئے وزیر اعظم کے انتخاب تک خواجہ فاروق قائم مقام وزیر اعظم کے فرائض سرانجام دیں گے۔
