اسلام آباد(وقائع نگار خصوصی)قومی اسمبلی کی قائمہ کمیٹی خزانہ کے اجلاس میں منی بل اتفاق رائے سے مسترد کرتے ہوئے پنجاب الیکشن کے لیے فنڈز کی فراہمی سے معذرت کر لی۔
”پاکستان ٹائم“ کے مطابق وزارت خزانہ نے پنجاب الیکشن کے لیے فنڈز کی فراہمی سے معذرت کرلی،وزیر مملکت برائے خزانہ عائشہ غوث پاشا نے کہا کہ ملک کی مکمل مالی صورت حال آپ کے سامنے رکھ دی ہے،ہم عالمی مالیاتی ادارے( آئی ایم ایف)پروگرام میں ہیں مالی خسارہ ہدف میں رکھنے کے پابند ہیں،پیٹرولیم سبسڈی سکیم تھی مگر اس کے عمل درآمد کا کوئی طریقہ کار نہیں،آئی ایم ایف کو بتایا ہے کہ طریقہ کار تیار کریں گے تو اعتماد میں لیا جائے گا۔وجیہہ قمر کا کہنا تھا کہ اس وقت خزانہ کی صورتحال عوام کے سامنے لانے کی ضرورت ہے۔اس موقع پر سید حسین طارق نے کہاکہ وزارت خزانہ قائمہ کمیٹی کو بتائے کہ کیا وہ پیسے فراہم کر سکتی ہے؟۔خالد مگسی کا کہنا تھا کہ مالی مشکلات کے باعث سیلاب سے متاثرہ بلوچستان اور سندھ کو امداد نہیں ملی،قیصر احمد شیخ کا کہنا تھا کہ ملک اس وقت تاریخ کے بدترین معاشی بحران سے گزر رہا ہے،اگر وزیر خزانہ نہیں آتے تو میں چیئرمین شپ سے استعفیٰ دے دوں گا، گزشتہ ایک سال سے نیشنل بینک اور زرعی ترقیاتی بینک کا سربراہ نہیں لگایا گیا۔اس موقع پر برجیس طاہر کا کہنا تھا کہ پنجاب اور خیبرپختونخوا میں الیکشن کیلئے فنڈز کی فراہمی کو مسترد کرتے ہیں۔
