اسلام آباد(وقائع نگار خصوصی)وزیراعظم شہباز شریف اور ایرانی صدر ابراہیم رئیسی کے درمیان ٹیلی فونک رابطہ ہوا ہے جس میں دونوں رہنماو¿ں نے دو طرفہ تعلقات کو مضبوط بنانے کے لئے عزم کا اعادہ کیا،وزیراعظم نے ایران اور سعودی عرب کے درمیان سفارتی تعلقات کی بحالی کی پیشرفت پر مبارکباد دی جبکہ دونوں رہنماوں نے فلسطین میں اسرائیل کی طرف سے انسانی حقوق کی خلاف ورزیوں کی مذمت کی ہے۔
”پاکستان ٹائم“ کے مطابق وزیراعظم شہباز شریف نے ایرانی صدر سید ابراہیم رئیسی کے ساتھ ٹیلی فونک گفتگو کے دوران ایران کے ساتھ باہمی دلچسپی کے تمام شعبوں بالخصوص تجارت، توانائی تعاون، سلامتی اور علاقائی استحکام میں دوطرفہ تعلقات کو مضبوط بنانے کے پاکستان کے عزم کا اعادہ کیا ہے۔ وزیراعظم نے پولان گبد بجلی کی ترسیلی لائن کے حالیہ آپریشنل ہونے پر اطمینان کا اظہار کیا اور اس سلسلے میں ایرانی حکومت کے تعاون کو سراہتے ہوئے دونوں ممالک کے درمیان باہمی افہام و تفہیم، تعاون کو فروغ دینے کے لیے ثقافتی، تعلیمی تبادلوں سمیت عوام سے عوام کے رابطوں کو بڑھانے کی ضرورت پر زور دیا۔شہباز شریف نے خطے میں امن و استحکام کے فروغ کے لیے ایرانی قیادت کی کوششوں کو سراہتے ہوئے صدر ابراہیم رئیسی کو ایران اور سعودی عرب کے درمیان سفارتی تعلقات کی بحالی کی تاریخی پیش رفت پر مبارکباد دی۔وزیراعظم نے فلسطین کے مقبوضہ علاقے میں اسرائیل کی انسانی حقوق کی خلاف ورزیوں کو فوری طور پر بند کرنے کا مطالبہ کیا اور اقوام متحدہ کی قراردادوں کے مطابق دو ریاستی حل کی بنیاد پر اسرائیل فلسطین تنازعہ کے منصفانہ اور دیرپا حل کی ضرورت پر زور دیا۔دونوں رہنماو¿ں نے باہمی دلچسپی کے تمام امور پر قریبی رابطہ برقرار رکھنے کے عزم کا اعادہ کیا۔
