نیو یارک(مانیٹرنگ ڈیسک)معروف امریکی عیسائی پادری ہلیرین ہیگی نے اسلام قبول کرکے اپنا نام سعید عبدالطیف رکھ لیا ہے انہوں نے گزشتہ ماہ دائرہ اسلام میں داخل ہونے کا اعتراف کیاتھا۔اب ان کا کہنا ہے کہ امریکہ میں مسلمانوں کے بارے میں لوگوں کا رویہ تبدیل ہو رہا ہے
”پاکستان ٹائم“ کے مطابق عیسائی مذہب کی تعلیم دینے اور مسلمانوں کو تنقید کا نشانہ بنانے والے پادری ہلیرین ہیگی اسلام قبول کرنے کے بعد دین اسلام کا درس دے رہے ہیں۔معروف امریکی عیسائی پادری فادر ہلیرین ہیگی نے اسلام قبول کرنے کا اعلان گزشتہ ماہ ٹوئٹر پر کرتے ہوئے کہا تھا کہ اسلام کی طرف میری کشمکش بالآخر مجھے اللہ کے گھر لے گئی۔20سالوں میں پہلے بار میں ایسا سکون محسوس کرتا ہوں جو خوشی اور راحت سے بھرپور ہے،اب میرا ایمان کی گہرائی،تعلیم،دین سے محبت،امت سے محبت،عشق رسول ﷺمیں داخل ہونے کا سفر شروع ہو تا ہے۔انہوں نے کہا کہ نائن الیون کے بعد ایک طویل عرصہ تک ہمیں بتایا گیا کہ مسلمان اور اسلام امریکی طرز زندگی کے لئے سب سے بڑا خطرہ ہیں،جس کے بعد اس وقت کچھ مسلمانوں نے اپنے آپ کو امریکی ثقافت میں بدل لیا تاہم اب حالات بتدریج بہتر ہو رہے ہیں اور امریکہ میں اسلام کے حوالے سے تاثر اور لوگوں کا رویہ تبدیل ہو رہا ہے۔
واضح رہے کہ نائن الیون کے واقعے کے بعد پادری ہلیرین ہیگی نے مسلمانوں کو غلط ثابت کرنے کے لئے قرآن کریم کا مطالعہ شروع کیا، وہ ارادہ رکھتا تھا کہ قرآن پاک میں سے غلطیاں نکال کر مسلمانوں سے مناظرے کرے گالیکن غلطیاں ڈھونڈنے کی کوشش میں اس کا دل دین اسلام کی جانب راغب ہو گیا، اس نے تسلیم کیا کہ دین اسلام ہی دین حق اور دین فطرت ہے اور آپ ﷺآخری نبی ہیں۔
