لاہور(خصوصی رپورٹر)اینٹی کرپشن پنجاب نے سابق وزیر مملکت اور پاکستان تحریک انصاف(پی ٹی آئی)کی مرکزی رہنما زرتاج گل اور ان کے شوہر ہمایوں رضا اخوند کو ٹھیکوں کی مد میں رشوت وصول کرنے کے الزام میں 19 اپریل کو طلب کر لیا ہے۔
”پاکستان ٹائم“ کے مطابق اینٹی کرپشن پنجاب نے سابق وزیر مملکت زرتاج گل کو 19 اپریل کو صبح 10 بجے دوبارہ طلب کرلیا،اس سے قبل انہیں 10 اپریل کو طلب کیا تھا مگر وہ پیش نہیں ہوئیں۔زرتاج گل پر الزام ہے کہ انہوں نے اپنے حلقے میں پبلک ہیلتھ انجینئرنگ کے مختلف منصوبوں کے ٹھیکے اپنے فرنٹ مینوں کو دیے اور مارکیٹ سے کم ریٹ پر دیے۔انہوں نے اور ان کے خاوند ہمایوں رضا اخوند نے پبلک ہیلتھ انجینئرنگ کے ان منصوبوں کو ریوائز کروایا اور ان کی لاگت دوگنا کروائی۔دونوں نے منصوبوں کو ریوائز کروا کر سرکاری خزانے کو کروڑوں کا نقصان پہنچایا۔سابق وزیر مملکت زرتاج گل نے تمام منصوبوں کے ٹھیکے اپنے فرنٹ مینوں کو دے کر بھاری رشوت وصول کی،منظورشدہ منصوبوں کے پلان میں ازخود تبدیلی کر کے اپنے گھر اور سیکرٹریٹ کو پختہ سڑک سے منسلک کیا۔زرتاج گل نے پبلک ہیلتھ انجینئرنگ کے منصوبوں میں ناقص میٹریل استعمال کرایا جس کی وجہ سے کام مکمل ہونے سے پہلے ہی گلیاں ٹوٹ پھوٹ کا شکار ہوگئیں۔اینٹی کرپشن نے زرتاج گل،ان کے خاوند ہمایوں رضا اخوند،پرائیویٹ کنٹریکٹر محمود بھٹی، ایکسیئن پبلک ہیلتھ انجینئرنگ ڈی جی خان،ایس ڈی او پبلک ہیلتھ انجینئرنگ ڈی جی خان،سب انجینئر متعلقہ سکیمز پبلک ہیلتھ ڈی جی خان کو 19 اپریل کو صبح 10 بجے طلب کر لیا۔
