اسلام آباد(وقائع نگار خصوصی)وزارت دفاع نے سپریم کورٹ میں سربمہر رپورٹ جمع کروا دی جس میں انتخابات کا حکم واپس لینے کی استدعا کی گئی ہے۔
”پاکستان ٹائم“ کے مطابق وزارت دفاع نے سربمہر درخواست سپریم کورٹ میں جمع کرا دی،جس میں عدالت عظمیٰ سے استدعا کی گئی ہے کہ ملک بھر میں ایک ساتھ انتخابات کرائے جائیں۔باخبر ذرائع کے مطابق سربمہر درخواست سپریم کورٹ سے وزارت دفاع کی جانب سے انتخابات کا حکم واپس لینے کی استدعا کی گئی ہے۔وزارت دفاع نے استدعا کی ہے کہ دہشت گردوں اورشرپسندوں کےانتخابی مہم پرحملوں کا خدشہ ہے،قومی،بلوچستان اورسندھ اسمبلیوں کی مدت پوری ہونے پرانتخابات کرائے جائیں۔واضح رہے سپریم کورٹ نے سٹیٹ بینک کو 17 اپریل تک پنجاب میں انتخابات کیلئے فنڈز جاری کرنے کا حکم دیا تھا۔پنجاب میں انتخابات کیلئے فنڈز کی فراہمی کے معاملے پر الیکشن کمیشن، وزارت خزانہ اور سٹیٹ بینک نے اپنی اپنی رپورٹس سپریم کورٹ میں جمع کرا دی ہیں۔سٹیٹ بینک نے فنڈز جاری نہ کرنے کی وجوہات بتائی ہیں جبکہ وزارت خزانہ کی رپورٹ میں کابینہ کے فیصلے اور پارلیمان کو معاملہ بھجوانے کی تفصیلات شامل ہیں۔ذرائع کے مطابق الیکشن کمیشن نے آگاہ کیا ہے کہ انتخابات کیلئے پیسے نہیں مل سکے،رپورٹ میں سیکیورٹی پلان نہ فراہم کئے جانے کا پہلو بھی شامل کیا گیا ہے۔
