لاہور(کورٹ رپورٹر)پاکستان تحریک انصاف(پی ٹی آئی)کے صدر اور سابق وزیر اعلیٰ پنجاب چوہدری پرویز الٰہی نے اپنے خلاف درج مقدمات کی تفصیلات کی فراہمی کیلئے لاہور ہائیکورٹ سے رجوع کر لیا۔
”پاکستان ٹائم“ کے مطابق تحریک انصاف کے مرکزی صدر چوہدری پرویز الٰہی نے اشتیاق اے خان ایڈووکیٹ کے توسط سے لاہور ہائیکورٹ میں درخواست دائر کی، جس میں مقدمات کی تفصیلات فراہم نہ کرنے کے اقدام کو چیلنج کیا گیا۔درخواست میں موقف اختیار کیا گیا کہ درخواست گزار کو خدشہ ہے ان کیخلاف مقدمات درج ہیں جو ان کے علم میں نہیں۔ عدالت تمام مقدمات کی تفصیل طلب کرے،جب تک تفصیلات فراہم نہ ہو جائیں پولیس کو پرویز الٰہی کی گرفتاری سے روکا جائے۔درخواست میں یہ بھی استدعا کی گئی کہ پولیس سمیت دیگر اداروں کو چادر اور چار دیواری کا تقدس پامال کرنے سے روکا جائے، پرویز الٰہی اور انکے خاندان کے ارکان کو غیر قانونی طور پر ہراساں نہ کیا جائے۔ پرویز الٰہی کو مقدمے کی صورت میں گرفتاری سے پہلے عدالت میں پیش ہونے کا موقع دیا جائے۔
