گجرات(سٹاف رپورٹر)پاکستان تحریک انصاف(پی ٹی آئی) کے مرکزی صدر اور سابق وزیراعلیٰ پنجاب چوہدری پرویزالٰہی نے کہا ہے کہ مولانافضل الرحمان کو الیکشن کی جلدی تھی، آج وہی الیکشن کی مخالفت میں پیش پیش ہیں، سپریم کورٹ نے حکومت کو آخری موقع دے دیا ہے، سپریم کورٹ کی مزید حکم عدولی پر نااہلی پکی ہے۔
”پاکستان ٹائم“کے مطابق گجرات میں میڈیا سے گفتگو کرتے ہوئے سابق وزیراعلیٰ پنجاب چوہدری پرویز الٰہی نے کہا کہ مولانا فضل الرحمان کا بیان غیر ذمہ دارانہ اور ناقابل قبول ہے، فضل الرحمان کو الیکشن کی جلدی تھی، آج فضل الرحمان الیکشن کی مخالفت میں پیش پیش ہیں، مولانا فضل الرحمان بتائیں ،کیا یہ کھلا تضاد نہیں ہے؟۔چوہدری پرویز الٰہی نے کہا کہ پنجاب میں ن لیگ کو ٹکٹ کے لئے امیدوار ہی نہیں ملے، انہوں نے اپنی خفت مٹانے کے لئے الیکشن کا بائیکاٹ کیا، کوئی ن لیگ کا ٹکٹ لے کر اپنا سیاسی مستقبل تاریک کرنا نہیں چاہتا، ن لیگ کے بائیکاٹ سے کوئی فرق نہیں پڑتا، پنجاب میں ن لیگ کی شکست نوشتہ دیوار بن چکی ہے۔ان کا کہنا تھا کہ ن لیگ کو اب سمجھ آئی کہ مذاکرات کے بغیر کوئی رستہ نہیں نکلنا، سیاسی مذاکرات بھی آئینی حدود میں رہ کر ہی ہوسکتے ہیں، عمران خان نے الیکشن پر مذاکرات سے کبھی انکار نہیں کیا۔
