اسلام آباد(کورٹ رپورٹر)چیف جسٹس سپریم کورٹ آف پاکستان جسٹس عمر عطاء بندیال کا بینچ اچانک ڈی لسٹ کر دیا گیا جبکہ بینچ کے سامنے سماعت کے لئے مقرر تمام مقدمات بھی ڈی لسٹ کر دیے گئے۔
”پاکستان ٹائم“ کے مطابق رجسٹرار سپریم کورٹ نے مقدمات ڈی لسٹ ہونے کا نوٹیفکیشن جاری کر دیا تاہم نوٹی فکیشن میں بینچ ڈی لسٹ کرنے کی وجوہات نہیں بتائی گئیں تھی۔چیف جسٹس پاکستان کے بینچ میں جسٹس جمال مندوخیل اور جسٹس اطہر من اللّٰہ بھی شامل تھے۔بینچ کے سامنے آج 12 مقدمات سماعت کے لئے مقرر کیے گئے تھے۔سپریم کورٹ کے بینچ نمبر 2 کے مقدمات کی فہرست بھی منسوخ کر دی گئی۔
جسٹس سردار طارق مسعود اور جسٹس شاہد وحید پر مشتمل بینچ کی کازلسٹ بھی منسوخ کر دی گئی تاہم اس ضمن میں سپریم کورٹ رجسٹرار کے جاری کردہ نوٹیفکیشن میں بینچ نمبر 2 کے مقدمات ڈی لسٹ کرنے کی وجہ کا ذکر نہیں کیا گیا۔دوسری طرف پبلک ریلیشن افسر(پی آر او) نے ایک بیان جاری کرتے ہوئے کہا ہے کہ’مطلع کیا جاتا ہے کہ 26 اپریل 2023 بروز بدھ کے لیے بینچ نمبر ایک کے حوالے سے عدالتی روسٹر پر نظر ثانی کی گئی ہے جس کی وجہ چیف جسٹس آف پاکستان کی ناسازی طبیعت ہے‘۔
