گورنر خیبر پختونخوا بڑی مشکل میں پھنس گئے،عہدے سے ہٹانے کیلئے پشاور ہائیکورٹ میں درخواست دائر

پشاور(کورٹ رپورٹر)جمعیت علماءاسلام ف سے تعلق رکھنے والے گورنر خیبرپختونخوا حاجی غلام علی بڑی مشکل میں پھنس گئے ،عہدے سے ہٹانے کیلئے پشاور ہائیکورٹ میں درخواست دائر کردی گئی۔
”پاکستان ٹائم “ کے مطابق گورنر خیبرپختونخوا حاجی غلام علی کو عہدے سے ہٹانے کے لئے پشاور ہائیکورٹ میں درخواست دائر کردی گئی۔گورنر خیبرپختونخوا کو عہدے سے ہٹانے کے لئے ہائیکورٹ میں معظم بٹ ایڈووکیٹ نے درخواست دائر کی۔دائر درخواست میں صدر پاکستان،ڈاکٹر عارف علوی،وفاقی حکومت،گورنر خیبرپختونخوا حاجی غلام علی اور الیکشن کمیشن کو فریق بنایا گیا ہے۔درخواست میں موقف اختیار کیا گیا کہ آئین پاکستان کے مطابق گورنر نگراں حکومت کے قیام کے بعد الیکشن تاریخ دینے کا پابند ہوتا ہے لیکن گورنر نے اسمبلی تحلیل کے 90 روز گزرنے کے باوجود الیکشن تاریخ نہیں دی اس لئے گورنر خیبر پختونخوا نے آئین کی خلاف وزری کی،گورنر کے خلاف آرٹیکل 6 کی کارروائی کی جائے اور صدر پاکستان قائمقام گورنر نامزد کریں۔درخواست میں یہ بھی استدعا کی گئی ہے کہ عدالت الیکشن کمیشن کو خیبرپختونخوا اسمبلی انتخابات کی تاریخ دینے کا حکم دیں جبکہ نگران حکومت کی 90 دن مدت ختم ہوگئی،نگراں وزارء اپنے دفاتر خالی کریں۔