کراچی(وقائع نگار)پاکستان تحریک انصاف (پی ٹی آئی)کے مرکزی رہنما اور سابق وفاقی وزیرسید علی زیدی کا کہنا ہے کہ سپریم کورٹ انتخابات سے متعلق اپنے فیصلے پر عملدرآمد کروائے گی۔
”پاکستان ٹائم“کے مطابق وزیراعظم شہباز شریف کی زیر صدارت اتحادی جماعتوں کے اجلاس میں شہباز شریف کے بیان پر سخت ردعمل دیتے ہوئے سید علی زیدی کا کہنا تھا کہ سپریم کورٹ کے احکامات پر عملدرآمد ہر کسی کا فرض ہے، کوئی بھی عدالت عظمیٰ کے فیصلے سے انحراف نہیں کر سکتا، آئین کے مطابق 90 دن میں پنجاب اور خیبرپختونخوا میں الیکشن ہونے تھے، 90 دن گزر گئے، الیکشن نہیں ہوئے تو توہین عدالت لگتی ہے۔علی زیدی کا کہنا تھا کہ ہم نے ہمیشہ سپریم کورٹ کے احکامات مانے لیکن یہ آئین و قانون نہیں مانتے، ہم پہلے روز سے ہی مذاکرات کی بات کر رہے ہیں، البتہ سپریم کورٹ اپنے فیصلے پر عملدرآمد کروائے گی۔انہوں نے کہا کہ ہمارے 9 ارکان اسمبلی کو اجلاس میں شرکت کی اجازت نہیں دی جا رہی، عدالت 9 ارکان سے متعلق فیصلہ دے چکی ہے۔
