لندن(مانیٹرنگ ڈیسک) پاکستان کے لیے سیاسی عدم استحکام،سیکیورٹی اور معاشی کمزوریوں کو بڑے مسائل قرار دیتے ہوئے ممتاز برطانوی جریدے”کانومسٹ “نے واضح طور پر کہا ہے کہ ڈیفالٹ سے بچنے کے لیے پاکستان کو عالمی مالیاتی ادارے(آئی ایم ایف)کا نیا پروگرام لینا پڑے گا۔
”پاکستان ٹائم“ کے مطابق ”اکانومسٹ انٹیلی جنس یونٹ“ نے پاکستان میں عام انتخابات اکتوبر 2023 میں ہونے کی پیش گوئی کرتے ہوئے کہا ہے کہ موجودہ حکومت کا اپنی مدت پوری کرنے کا امکان ہے تاہم مہنگائی اور ٹیکسوں کا بوجھ بڑھنے سے موجودہ حکومت مقبولیت کھو چکی ہے۔رپورٹ میں پیش گوئی کی گئی ہے کہ ڈالر 2023 میں 291 روپے اور سال 2025 میں 302 تک جا سکتا ہے جب کہ 2024 سے 2027 کے درمیان روپیہ کمزور رہے گا، شرح سود کے مزید 2 فیصد بڑھ کر 23 فیصد تک جانے کا امکان ہے۔
جاری کردہ رپورٹ میں بتایا گیا ہے کہ پاکستان کو چار سال میں 77.5 ارب ڈالر بیرونی قرضہ واپس کرنا ہے، معاشی شرح نمو اس سال 1.5 فیصد جب کہ اگلے سال منفی 0.2 فیصد رہنے کا امکان ہے۔اکانومسٹ انٹیلی جنس یونٹ کی رپورٹ کے تحت رواں سال مہنگائی 30.3 فیصد، اگلے سال مہنگائی 20.8 فیصد پر ا?جائے گی جب کہ رواں سال بے روزگاری 9.6 فیصد اور اگلے سال بڑھ کر 9.9 فیصد ہو جائے گی۔
