اسلام آباد(سٹاف رپورٹر)وزیرخارجہ بلاول بھٹو زرداری کی کاوشیں رنگ لے آئیں،خنجراب بارڈر پر سرحدی تجارت کا دوبارہ آغاز ہوگیا۔
پاکستان ٹائم کے مطابق وزیرخارجہ بلاول بھٹو زرداری نے چین کی حکومت سے خنجراب بارڈر پر پورا سال تجارت جاری رکھنے کا مطالبہ بھی منظور کروا لیا،بلاول بھٹو زرداری کی کامیاب سفارتکاری کی بدولت چین نے برآمد ہونے والی مختلف مصنوعات پر عائد پابندیاں بھی ختم کر دیں،بلاول بھٹو زرداری کے حق میں گلگت بلتستان اسمبلی نے خنجراب بارڈر پر تجارت کے دوبارہ آغاز کے حوالے سے قرارداد منظور کر لی۔وزیرخارجہ بلاول بھٹو زرداری سے گلگت بلتستان کی عوام کا دیرینہ مطالبہ پورا کرنے پر پیپلز پارٹی گلگت بلتستان کے صدر امجد حسین ایڈووکیٹ نے اظہار تشکر کرتے ہوئے کہا کہ خنجراب بارڈر سے تجارت کے دوبارہ آغاز اور اس کے پورا سال جاری رہنے کے عمل سے ملک کی مجموعی معیشت پر مثبت اثرات مرتب ہوں گے۔وزیرخارجہ بلاول بھٹو زرداری نے خنجراب بارڈر پر تجارتی عمل کے پورے سال کیلئے آغاز اور عائد دیگر پابندیوں کے خاتمے پر گلگت بلتستان کے عوام کو مبارک باد دی۔
