سیالکوٹ(وقائع نگار خصوصی)وزیر دفاع اور پاکستان مسلم لیگ ن کے رہنما خواجہ محمد آصف کا کہنا ہے کہ اداروں کو آئین وقانون کی حدود میں رہ کرکام کرنا چاہئے،آئین میں کہاں لکھا ہے کہ عدلیہ مذاکرات کروائے گی؟تحریک انصاف احتجاج کرے تاکہ یہ مذاکرات تو ختم ہوں،عمران خان اور سہولت کاروں نے مل کر نواز شریف پر ظلم کیا،ساری دنیا کے ڈاکو عمران خان کے پرچم تلے اکٹھے ہو گئے،عمران خان نے باجوہ کو باپ کا درجہ دیا،اب اسکو نیند نہیں آتی،میں تو کہتا ہوں مذاکرات جلدی ختم ہوں تاکہ ہماری جان چھوٹے،عمران خان نے ٹکٹس کیلئے ریٹ لسٹ لگارکھی ہے،ثاقب نثار کا بیٹا ایک کروڑ 20 لاکھ کا ٹکٹ بیچ رہا تھا،غیر یقینی صورتحال میں میاں صاحب کو نہیں بلانا چاہتے،ہم چاہتے ہیں کہ وہ کسی ایسے وقت پر آئیں جس میں ان کے آنے کا سب سے زیادہ فائدہ ہے۔
”پاکستان ٹائم“ کے مطابق سیالکوٹ میں پریس کانفرنس کرتے ہوئے خواجہ آصف کا کہنا تھا کہ اداروں کو آئین و قانون کی حدود میں رہ کرکام کرنا چاہئے،آئین میں کہاں لکھا ہے کہ عدلیہ مذاکرات کروائے گی،آئین کے مطابق 90 دن میں الیکشن ہونا ہیں تو ایک دن میں ہونا بھی لکھا ہے،عدلیہ کا کام قانون اور آئین کے مطابق فیصلے کرنا ہے پنچایت لگانا نہیں،پنچایت لگانا یا مذاکرات کرنا سیاسی لوگوں کا کام ہے،جب عدلیہ کی بات آتی ہے تو یہ عوام کے اعتبار کی بات ہوتی ہے،عمران خان کو ضمانتیں مل رہی ہیں اور جیلوں میں عام شہری قید ہیں،پاناما سے شروع ہونے والا ڈرامہ آج بھی جاری ہے۔
خواجہ آصف نے کہا کہ نواز شریف اور ان کے خاندان کے ساتھ ظلم کی انتہا کی گئی،عمران خان اور سہولت کاروں نے ان پر ظلم کیا لیکن ہمارے قائد نے اپنا معاملہ اللہ پر چھوڑ دیا،ملک میں غیر یقینی صورتحال ہے،نوازشریف کو بلانا نہیں چاہتے،ان کی واپسی سے سیاسی بہتری آئے گی،انہیں اس وقت بلانا چاہئے جس کا ہمیں فائدہ ہو،وہ لازمی آئیں گے پاکستان ان کا وطن ہے۔خواجہ آصف کا کہنا تھا کہ پاکستان کو جان بوجھ کر معاشی اور سیاسی بحران میں دھکیلا گیا، تمام ڈاکو پی ٹی آئی کے جھنڈے تلے جمع ہو رہے ہیں،تحریک انصاف نے ٹکٹوں کی منڈی لگائی ہوئی ہے،ان کے ایک وزیر نے سی پیک کے خلاف بیان دیئے،نواز شریف نے ملک سے بجلی کی لوڈشیڈنگ کا خاتمہ کیا اور پی ٹی آئی دور میں بجلی کی لوڈشیڈنگ دوبارہ شروع ہو گئی۔
انہوں نے کہا کہ گزشتہ چند ماہ کے دوران حالات نے کروٹ لی ہے،ثاقب نثار نواز شریف کی دشمنی میں بہت دور نکل گئے تھے،آڈیو لیکس کے ذریعے اہم انکشافات سامنے آئے ہیں اور ان آڈیوز سے ثاقب نثار کا خاندان اور پی ٹی آئی بے نقاب ہوئی ہے،سابق چیف جسٹس نے تسلیم کیا کہ بیٹے کی آواز اصل ہے،آڈیو لیکس میں ملاقات کے ریٹ سامنے آئے ہیں، ثاقب نثار نے ٹی وی پر تسلیم کیا کہ یہ میرے بیٹے کی آڈیو ہے، ثاقب نثار ہی نہیں تحریک انصاف کی لیڈرشپ بھی بے نقاب ہوگئی ہے۔
خواجہ آصف کا کہنا تھا کہ تحریک انصاف کے لوگوں نے پہلے استعفوں کی منظوری کیلئے عدالت سے رجوع کیا اور جب استعفے منظور ہوئے تو کہا کہ منظور نہ کیے جائیں،عمران خان آئے روز یو ٹرن لے لیتے ہیں،وہ بھول جاتے ہیں کہ پہلے کیا بات کی تھی؟عمران خان کو اب نئے سہولت کار ملے ہوئے ہیں،عمران خان کے نئے سہولت کار سن بھی لیں اور دیکھ بھی لیں کہ پرانے سہولت کاروں کے ساتھ کیا ہو رہا ہے؟عمران خان نے وزیر آباد کا لانگ مارچ بھی کسی کے کہنے پر کیا تھا،اقتدار سے دوری عمران خان کو اندر سے کھائے جا رہی ہے،آج ملک کے تمام بحرانوں کے ذمہ دار عمران خان ہیں،یہ شوق سے لانگ مارچ بھی کر لیں تاکہ بعد میں انہیں کوئی گلہ نہ رہے۔
خواجہ آصف نے کہا کہ پی ٹی آئی کا کوئی کارکن پرویز الٰہی کےساتھ نہیں،پرویز الٰہی کے گھر چھاپہ پنجاب کی نگران حکومت نے کیا ہے اور یہ کسی سے چھپ کر نہیں کیا،سب کے سامنے کیا ہے اور وہ اس پر کھڑے ہیں،عمران خان کے اردگرد جتنے لوگ ہیں کوئی بھی پی ٹی آئی کا نہیں،سب تھرڈ ہینڈ لوگ ہیں،سب مسافر ہیں، سب کے بیگ تیار ہیں۔خواجہ آصف نے کہا کہ ہمیں فوری طورپر الیکشن میں جاناچاہئے تھا،ہم نے حالات درست کرنے کی بہت کوشش کی لیکن حالات اب بھی عوام کیلئے بہتر نہیں ہوسکے،آئی ایم ایف کی تمام شرائط طے کردی ہیں،امید ہے آئی ایم ایف جلد پیش رفت کرے گا،ملک میں مہنگائی ہے مگر منافع خوری عروج پر ہے۔
