کراچی(وقائع نگار)پاکستان تحریک انصاف(پی ٹی آئی) کے جنرل سیکرٹری اور سابق وفاقی وزیر اسد عمر نے متحدہ قومی موومنٹ(ایم کیو ایم)پاکستان کو آڑے ہاتھوں لیتے ہوئے الزام عائد کیا ہے کہ کراچی کی حد تک مردم شماری کے نتائج درست نہیں لیکن ایم کیو ایم نے آواز بلند کرنے کی بجائے شہباز شریف کو اعتماد کا ووٹ دے کر کراچی کا سودا کیا ہے، ذاتی مفادکیلئے ملک کیلئے خطرہ اور آئین سے انخراف کیا جا رہا ہے۔
”پاکستان ٹائم“ کے مطابق کراچی میں پریس کانفرنس کرتے ہوئے اسد عمر کا کہنا تھا کہ کچھ لوگ نہیں چاہتے کہ پاکستان میں رہنے والوں کو صحیح سے شمار کیا جائے، واضح ہو گیا کہ ایم کیو ایم کو نتائج قبول ہیں، آئین کے مطابق ملک میں ہر 10 سال بعد مردم شماری ہونی چاہئے، لیکن گزشتہ 2 مردم شماریوں میں تاخیر کی گئی، حالیہ ہونے والی دونوں مردم شماری کے نتائج پر احتجاج کیا گیا، کیوں کہ ان کے نتائج حقائق سے متصادم تھے، صوبوں نے مردم شماری کے نتائج کو مسترد کیا، ملک میں ہر شخص کو گنا جانا چاہئے، مردم شماری زمینی حقائق کی درست نمائندگی نہیں کررہی۔اسد عمرکا کہنا تھا کہ مردم شماری کے اعداد و شمار صوبائی وسائل سے حاصل کیے جاتے ہیں، اس میں شفافیت ہونا چاہئے، کراچی کی حد تک مردم شماری کے نتائج درست نہیں، لیکن ایم کیوایم مردم شماری کے نتائج سے مطمئن نظر آرہی ہے، اسی لئے اس قومی اسمبلی میں مردم شماری کے خلاف آواز اٹھانے کے بجائے وزیراعظم کو اعتماد کا ووٹ دیا، ایم کیو ایم نے کراچی کا سودا کیا۔اسد عمر نے کہا کہ ذاتی مفاد کیلئے ملک کیلئے خطرہ پیدا کیا جا رہا ہے، اور آئین سے انخراف کیا جا رہا ہے، آئین کے مطابق 90 روز میں انتخابات لازمی ہیں، انتخابات مردم شماری کی بنیاد پر ہونے ہیں، ملک کو آئین کے مطابق چلانے کیلئے مردم شماری پر سب کا اعتماد ضروری ہے، ہر شہری کو مردم شماری میں بنیادی حق دیا جائے۔
