اسلام آباد(وقائع نگار)سابق وزیر اعظم عمران خان کی گرفتاری پر پاکستان تحریک انصاف(پی ٹی آئی)نے سخت ردعمل دیتے ہوئے کہا ہے کہ عمران خان کی گرفتاری لندن پلان کا منصوبہ ہے،عوام گھروں سے باہر نکلیں،اسلام آباد ہائیکورٹ پر حملہ کیا گیا ہے،عمران خان ہماری ریڈ لائن ہے جو انہوں نے کراس کر لی ہے۔
”پاکستان ٹائم“ کے مطابق پی ٹی آئی رہنما شاہ محمود قریشی نے پارٹی چیئرمین کی گرفتاری پر شدید ردعمل دیتے ہوئے کہا کہ عمران خان کی گرفتاری کی مذمت کرتا ہوں،بھونڈے انداز میں عمران خان کو گرفتار کیا گیا،عمران خان نے اسلام آباد روانگی سے قبل کہا تھا وارنٹ دکھائیں،گرفتاری دے دوں گا۔انہوں نے کہا کہ عمران خان عدالت میں بائیو میٹرک کرارہے تھے،ان کی گرفتاری کے لیے پولیس اور رینجرز نےعدالت میں آ کر حملہ کیا،عدالت کے شیشے توڑے گئے اور تشدد کیا گیا، عمران خان کے گارڈز پر حملہ کیا گیا،اس تشدد کا کوئی جواز نہیں بنتا،پی ٹی آئی رہنماوں سے رابطے میں ہوں،عمران خان کی گرفتاری لندن پلان کا منصوبہ ہے،ان کی گرفتاری پر کارکنوں میں بے چینی ہے،عمران خان کی گرفتاری پر بھرپور ردعمل دیں گے،چیئرمین پی ٹی آئی کی گرفتاری قابل قبول نہیں ہے،احاطہ عدالت میں غنڈہ گردی کا کوئی جواز نہیں تھا،سابق وزیر اعظم کو فوری عدالت میں پیش کیا جانا چاہئے۔
فواد چوہدری نے کہا کہ اسلام آباد ہائیکورٹ پر رینجرز نے قبضہ کر لیا ہے،وکلاءکو تشدد کا نشانہ بنایا جا رہا ہے،عمران خان کی گاڑی کے گرد گھیرا ڈال لیا گیا ہے،عوام گھروں سے باہر نکلیں،اسلام آباد ہائیکورٹ پر حملہ کیا گیا ہے،عمران خان کی گرفتاری عدلیہ کو بند کرنے کے مترادف ہے۔دوسری طرف سابق وزیر اعظم عمران خان کی گرفتاری کے معاملے پر پاکستان تحریک انصاف کی قیادت نے کارکنوں کو لبرٹی چوک پہنچنے کی ہدایت کرتے ہوئے ڈاکٹر یاسمین راشد نے کہا کہ ٹکٹ ہولڈر پارٹی عہدیداران اور کارکنان لبرٹی چوک پہنچیں۔پاکستان تحریک انصاف کی رہنما عندلیب عباس اور حماد اظہر نے عمران خان کی گرفتاری کی شدید مذمت کرتے ہوئے کہا کہ عمران خان ہماری ریڈ لائن ہے جو انہوں نے کراس کر لی ہے۔عوامی مسلم لیگ کے سربراہ شیخ رشید کا کہنا تھا عمران خان کی گرفتاری انتقامی کارروائی ہے،ان کو طاقت کے ذریعے ختم کرنے کی کوشش کی جارہی ہے،یہ فیصلہ حکومت کے گلے پڑے گا،گرفتاری سے عمران خان مزید مقبول ہوں گے،جیل جانے سے عمران خان کی سیاست مضبوط ہو گی،پاکستان ڈیفالٹ ہونے جا رہا ہے۔
