اسلام آباد (مانیٹرنگ ڈیسک) ترجمان پاک فوج میجر جنرل احمد شریف چودھری نے کہا ہے کہ ملک میں مارشل لاءلگنے کا سوال ہی پیدا نہیں ہوتا۔ فوج آرمی چیف جنرل عاصم منیر کی قیادت میں متحد ہے اور رہے گی، اندرونی اور بیرونی پروپیگنڈوں کے باوجود فوج متحد ہے اور رہے گی۔ پاک فوج کو تقسیم کرنے کا خواب خواب ہی رہے گا۔
”پاکستان ٹائم“ کے مطابق نجی ٹی وی سے خصوصی گفتگو کرتے ہوئے پاک فوج کے شعبہ تعلقات عامہ (آئی ایس پی آر) کے ڈائریکٹر جنرل (ڈی جی) نے کہا کہ فوج آرمی چیف جنرل عاصم منیر کی قیادت میں متحد ہے اور رہے گی، اندرونی اور بیرونی پروپیگنڈوں کے باوجود فوج متحد ہے اور رہے گی۔انہوں نے کہا کہ فوج میں کسی نےاستعفیٰ نہیں دیا اور نہ ہی کسی نے کوئی حکم عدولی کی۔ان سے پوچھا گیا کہ جو ڈیڈلاک ہے اس پر آپ جمہوریت کے تسلسل پر یقین رکھتے ہیں تو ڈی جی ا?ئی ایس پی ا?ر کا کہنا تھا کہ جی بالکل میں واضح طور پر کہہ رہا ہوں کہ آرمی کی سینئر قیادت، چیف آف آرمی سٹاف جنرل عاصم منیر جمہوریت پر مکمل یقین رکھتے ہیں۔ سپہ سالار اور عسکری قیادت جمہوریت کو سپورٹ کرتی ہے اور کرتی رہے گی، ملک میں مارشل لاءکا کوئی سوال ہی پیدانہیں ہوتا۔خیال رہے کہ یہ بیان ایک ایسے وقت میں آیا ہے جب پاکستان تحریک انصاف کے چیئر مین اور سابق وزیراعظم عمران خان کو اسلام آباد ہائیکورٹ میں گرفتار کیا گیا تھا اور ملک بھر میں پر تشدد مظاہرے ہوئے تھے، اسی دوران پر تشدد مظاہروں میں سکیورٹی اداروں کی بلڈنگز کو بھی نشانہ بنایا گیا تھا۔
