لاہور(وقائع نگار خصوصی ) نگران وزیر اعلی پنجاب محسن نقوی نے کور کمانڈر ہاس،عسکری و سول تنصیبات میں توڑ پھوڑ اور جلاؤ گھیراؤ کی تحقیقات کے لیے جوائنٹ انوسٹی گیشن ٹیم (جے آئی ٹی) بنانے کا فیصلہ کیا ہے۔
’’پاکستان ٹائم‘‘کے مطابق نگران وزیر اعلی محسن نقوی پنجاب سیف سٹیز اتھارٹی کے ہیڈ آفس پہنچے جہاں امن و امان کی صورتحال پر جائزہ اجلاس ہوا۔اجلاس میں فیصلہ کیا گیا کہ جے آئی ٹی واقعات کی تحقیقات کر کے جامع رپورٹ حکومت کو پیش کرے گی۔نگران وزیر اعلی پنجاب نے تمام شرپسندوں کو قانون کی گرفت میں لانے کے لیے کارروائیاں مزید تیز کرنے کا حکم دیا۔اجلاس کے دوران گفتگو کرتے ہوئے محسن نقوی نے کہا ہے کہ توڑ پھوڑ والے تمام مقامات کی جیو فینسنگ کرائی جائے گی۔شرپسندوں کے خلاف تمام کیس انسداد دہشت گردی کی عدالت میں چلائے جائیں گے،کسی گناہ گار کو چھوڑیں گے نہیں اور بے گناہ کو پکڑیں گے نہیں۔
محسن نقوی کا کہنا ہے کہ شواہد اور ثبوتوں کے ساتھ ہر شرپسند کو قانون کے کٹہرے میں لایا جائے گا،عسکری و سول املاک پر حملہ کرنے والے عناصر عبرتناک سزا سے نہیں بچ پائیں گے۔شرپسندوں کے خلاف زیرو ٹالرنس پالیسی اپنائی ہے، صورتحال میں بہتری آ رہی ہے،عوام کے جان و مال کے تحفظ کو یقینی بنائیں گے۔شرپسند عناصر کے مذموم عزائم کو ناکام بنانے کے لیے پوری فورس الرٹ ہے۔دوسری جانب امن و امان کی صورتحال کو برقرار رکھنے کے لیے پنجاب بھر میں دفعہ 144 کے نفاذ میں چار روز کی توسیع کر دی گئی۔محکمہ داخلہ پنجاب نے نوٹیفکیشن جاری کردیا۔محکمہ داخلہ پنجاب کی جانب کر دہ نوٹیفکیشن کے مطابق جلسے،جلوس،ریلیوں اور ہر قسم کے اجتماع پر پابندی ہو گی۔پولیس کے مطابق ہنگامہ آرائی میں ملوث دو ہزار آٹھ سو انتیس شرپسندوں کو گرفتار کیا جا چکا ہے۔
