کوئٹہ(سٹاف رپورٹر )سیکیورٹی فورسز نے بلوچستان میں ایف سی کمپانڈ مسلم باغ میں کلیئرنس آپریشن مکمل کرلیا۔ پاک فوج کے شعبہ تعلقات عامہ(آئی ایس پی آر)کے مطابق کمپاونڈ میں موجود تمام 6 دہشت گردوں کو ہلاک کر دیا گیا جبکہ اس دوران ایک شہری سمیت 7 جوان شہید اور ایک خاتون سمیت 6 افراد زخمی ہوئے۔کلیئرنس آپریشن 12مئی کی شام دہشت گردوں کے ابتدائی حملے کو پسپا کرنے کے بعد شروع ہوا تھا۔آئی ایس پی آر کا کہنا ہے کہ پیچیدہ کلیئرنس آپریشن میں یرغمالیوں کو بحفظات بچانا شامل تھا،دہشت گردوں نے اپنے خوفناک حملے سے بچوں کو بھی نہیں بخشا۔آئی ایس پی آر کے مطابق دہشت گردوں کے روابط کا پتا چلانے کے لیے ضروری انٹیلی جنس فالو اپ جاری ہے، دہشت گردوں کے سہولت کاروں اور سپانسرز کو گرفتار کیا جائے گا۔آئی ایس پی آر کا کہنا ہے کہ سیکیورٹی فورسز بلوچستان کے امن،استحکام اور ترقی میں حائل رکاوٹ کو ناکام بنانے کے لیے پرعزم ہیں۔
