فیصل آباد(بیورو رپورٹ)پاکستان مسلم لیگ ن کے مرکزی رہنما و سابق وزیر مملکت عابد شیر علی نے ایک بار پھر اخلاقی حدود و قیود کو عبور کرتے ہوئے عمران خان کو کڑی تنقید کا نشانہ بناتے ہوئے کہا ہے کہ نواز شریف میرا لیڈر ہے،وہ جب گرفتاری دینے آیا اپنی بیٹی کو ساتھ لے کر آیا،رینجرز کا شکریہ ادا کرتا ہوں جنہوں نے لنگڑے کو ٹانگ دے دی ہے،نواز شریف آنے والے چند ہفتوں میں پاکستان میں ہونگے،جب بیلنس آف پاور ہوگا پھر ہی انتخاب ہو گا،اس سے پہلے نہ تو کوئی انتخاب ہوگا اور نہ ہی کوئی ان کے نتائج کو تسلیم کرے گا،اب پیر سے پی ڈی ایم میں شامل تمام جماعتوں کے قائدین کے فیصلے کے مطابق فیصلہ کن راونڈ شروع کیا جا ئے گا اور جب تک لاڈلے کو دیگر سیاسی قائدین کی طرح انصاف کے کٹہرے میں نہیں لایا جاتا اس وقت تک آرام سے نہیں بیٹھا جا ئے گا۔
فیصل آباد پبلک سیکرٹریٹ نیو ناظم آباد میں خصوصی گفتگو کر تے ہو ئے عابد شیر علی نے کہا کہ عمران خان پر 170 ملین پاونڈ کی کرپشن کا اوپن اینڈ شٹ کیس ہے،جس کے تمام ثبوت موجود ہیں لیکن اس نے ایک بند لفافہ دکھا کر شہزاد اکبر کے ذریعے یہ رقم انتہائی ناجائز و غیر قانونی طور پر ملک ریاض کو واپس کر کے القادر ٹرسٹ کے نام پر7 ارب روپے کی زمین لی جو سنگین کرپشن اور اختیارات و عہدے کا ناجائز استعمال اور ملک و قوم کے ساتھ غداری و زیادتی ہے وگرنہ ہونا تو یہ چاہیے تھا کہ یہ رقم پاکستان آ کر حکومت کے خزانہ میں جمع اور عوام کی خوشحالی و فلاح و بہبود کے کاموں پر خرچ ہوتی۔
انہوں نے کہا کہ عمران نیازی بہت بڑے جرم کا مرتکب ہوا،نیشنل کرائم ایجنسی برطانیہ نے پاکستان سے لوٹا ہوا 70ارب روپیہ پاکستان کے حوالے کیا مگر عمران نیازی نے بند لفافے میں اپنی کابینہ سے اس کی اجازت لی اور 190ملین پاونڈ پاکستان کے لوگوں کو بھیجے گئے تھے جو لوٹا ہوا پیسہ تھا لیکن عمران خان نے ملک ریاض کو یہ لوٹا پیسہ واپس کر دیا حالانکہ وہ پیسہ پاکستان کے اکاونٹ میں آنا چاہئے تھا۔اس نے اسی ملک ریاض سے القادر ٹرسٹ کی زمین اپنے اور اپنی بیوی کے نام پر کروائی یہ پاکستان کی تاریخ کا سب سے بڑا فراڈ ہے مگر حیرت ہے کہ اسے کس طرح بیل آوٹ پیکج دیدیا گیا،نواز شریف کو بیٹے سے تنخواہ نہ لینے پر انکے خلاف فیصلہ دیا گیا جبکہ اس کے برعکس عمران خان کو وی آئی پی پروٹوکول دیا گیا،عمران خان کو فون کی سہولت دی گئی،انصاف فراہم کرنیوالوں کا یہ کام نہیں کہ جو ڈاکا مارے اس کو دس بندوں کا کھانا دے،مرسڈیز دے،اس شخص کو ضمانت ملی جس کے جتھوں نے قائد اعظم کا گھر جلا دیا، کور کمانڈر کا گھر جلا دیا،انڈیا کا میڈیا لڈیاں ڈال رہا ہے،عمران خان وطن دشمن ہے جس نے معیشت کا جنازہ نکالا اور پاکستانی معیشت کو آئی ایم ایف کے پاس گروی رکھوایا،یاسمین راشد،اعجاز چوہدری تمام لوگوں کی گفتگو ریکارڈ پر ہے کہ عمران خان نے کہا تھاکہ میرے پکڑے جانے پر پورا پاکستان جلا دینا وہ جلا دیا،یہ سیاسی فیصلے ہیں اس کو اب سیاسی انداز سے ہی نمٹیں گے۔
انہوں نے کہا کہ کل عمران خان آرمی چیف پر الزام تراشی کررہا تھاتو انڈین میڈیا خوش ہو رہا تھا،نواز شریف نے کہا تھا اگر غلط فیصلے ہوئے تو ڈالر 300 نہیں 500 کا ہو جائے گا یہی وجہ ہے کہ آج لاڈلے کی وجہ سے مہنگائی آسمان کو چھو رہی ہے،لاڈلے نے تین دن عوام کو جنگ میں دھکیلے رکھا،پہلے دن ہی کہہ دیتے کہ اسے چھوڑ دیں،توشہ خانہ کے کیس کو روک دیا گیا،پیر والے دن سے پی ڈی ایم اپنا احتجاج کرے گی جو ہمارا جمہوری حق ہے،ہم سیاسی لوگ ہیں ہم کسی جماعت کو پابندی لگا کر باہر نہیں کرنا چاہتے لیکن ہم یہ ضرور پوچھنا چاہتے ہیں کہ ایم کیو ایم پر کیوں پابندی لگی تھی،وہ انہی کاموں کی وجہ سے لگی تھی،ایم کیو ایم والوں کو چاہیے کہ وہ بھی سوال کریں کہ ہم پر پا بندی کیوں لگی ہے؟۔عابد شیر علی کا کہنا تھا کہ یہ کلیئر کٹ ناجائز اثاچہ جات کا کیس ہے لہٰذا اگر نواز شریف کو صرف اس بنا پر نااہل قرار دیا جاسکتا ہے کہ اس نے اپنے بیٹے سے تنخواہ نہیں لی تو عمران خان کو بھی اس سمیت دیگر کرپشن کیسز میں ہمیشہ ہمیشہ کیلئے نااہل ہونا چاہیے،یہ لاڈلے پر بے جا نوازشات کا ہی نتیجہ ہے کہ اس نے اپنی گرفتاری پر اپنے تربیت یافتہ دہشت گردوں کے ذریعہ وہ کام کروا دیا جو ہمارے ازلی دشمن سمیت دنیا کی کوئی طاقت پچھلے 70 سالوں میں نہیں کروا سکی،عمران خان کے اس اقدام پر بھارت میں جشن کا سماں ہے اور پاکستان کے تمام دشمن خوشی کے شادیانے بجارہے ہیں کہ جو کام وہ نہیں کرسکے وہ ان کے پروردہ ایجنٹ عمران خان نے کر دکھایا،بھارت والے بھی قائد اعظم کی رہائش گاہ کی عزت کرتے ہیں لیکن یہاں پاکستان میں قائد اعظم کی رہائش گاہ جلائی گئی،میڑو بسوں کو جلایا گیا،عمران نے دہشتگردوں کو ٹریننگ دی،ہونا تو یہ چاہیے تھا کہ پاکستان کی 22 کروڑ عوام کے ساتھ انصاف کیا جاتا لیکن نیب کے ملزم کو رہا کر دیا گیا،ہمیں 90، 90 روز کیلئے اندر کیا جاتا تھا اور ملاقاتوں پر بھی پابندی ہوتی تھی لیکن لاڈلے کیلئے سہولت کاری ہو رہی ہے، 8 دن کے ریمانڈ پر ایک ملزم کو جانے دیا گیا۔
عابد شیر علی نے کہا کہ ان کی آڈیوز ویڈیو لیک ریکارڈ پر ہیں،اس طرح کا اقدام جو بے گناہ پاکستانی جیلوں میں ہیں ان کے ساتھ ناانصافی ہے،عمران خان نے اپنے دوستوں سے این آر او لے لیا،اب فوج سے این آر او لینے کی کوشش کرتا ہے،ملک میں جو آج مہنگائی ہو رہی ہے اس کی وجہ بھی یہی ہے،اگر سڑکوں پر ایسے ہی فیصلے ہونے ہیں تو ایسے ہی سہی،پیر کو پی ڈی ایم کی جانب سے سپریم کورٹ کے باہر پرامن احتجاج کیا جائے گا یا پارلیمنٹ سرنڈر کریں گے یا پارلیمنٹ کو قوم کو تذبذب سے نکالنا ہو گا،پی ڈی ایم کے جو فیصلے ہوئے ہیں اس کے اثرات بہت جلد سامنے آئیں گے کیونکہ پارلیمنٹ سپریم ہے اس کے فیصلے بھی سب کو ماننے پڑیں گے۔
عابد شیر علی نے کہا کہ مسلح افواج نے دانشمندی دکھائی اور گولی نہیں چلائی کیونکہ وہ جانتے ہیں کہ عمران خان لاشیں چاہتا تھابالکل اسی طرح جس نے اپنے حواری طاہر القادری کے ساتھ مل کر ماڈل ٹاون میں خود لاشیں گرائیں اور پھر ان پر سیاست چمکائی،پورا پاکستان اپنی فوج کے ساتھ شانہ بشانہ کھڑا ہے،ہم عمران خان کو قانون کے کٹہرے میں لائیں گے،آنے والے دن بڑے اہم ہیں جس میں اہم فیصلے ہونے ہیں،ہم سیاسی لوگ ہیں سیاسی انداز سے مقابلہ کریں گے،نواز شریف پارٹی کی مشاورت کے ساتھ بہت جلد پارٹی کی نمائندگی کریں گے اور پاکستان آئیں گے۔
