لاہور(وقائع نگار )پاکستان تحریک انصاف(پی ٹی آئی) کے چیئرمین اور سابق وزیراعظم عمران خان نے کہا ہے کہ میں نے 22 مارچ کو بیان ریکارڈ کروایا تھا کہ کارکنان پرامن احتجاج کریں،ثابت کروں گا بندوق بردار افراد کو پرامن مظاہرین کی صفوں میں داخل کیا گیا۔
”پاکستان ٹائم“ کے مطابق مائیکرو بلاگنگ ویب سائٹ پر پیغام جاری ویڈیو بیان شیئر کرتے ہوئے عمران خان کا کہنا تھا کہ 18 مارچ کو اسلام آباد کے جوڈیشل کمپلیکس میں بچھائے گئے اپنے قتل کے جال سے رب العزت کے کرم سے بحفاظت نکلنے کے بعد میں نے 22 مارچ کو یہ بیان ریکارڈ کروایا۔میں نے نہایت اصرار سے اپنے کارکنان کو تلقین کی انہیں جتنا مرضی اشتعال دلوایا جائے،انہوں نے مکمل طور پر پر امن رہتے ہوئے ہی احتجاج کرنا ہے۔انشا اللہ جب بھی ایک آزادانہ تحقیق ہو گی میں یہ ثابت کروں گا،جلاو گھیراو کرنے والے بندوق برداروں کو بالکل اسی طرح پر امن مظاہرین کی صفوں میں داخل کیا گیا جیسے یہ اس موقع پر کرنے کی منصوبہ بندی کئے ہوئے تھے جس کا پردہ میں نے اس ویڈیو میں چاک کیا۔عمران خان نے اپنے 22 مارچ کے اپنے ویڈیو بیان میں کہا تھا کہ آئی جی پنجاب،آئی جی اسلام آباد اور ہینڈلرز نے زمان پارک کے باہر آپریشن کی منصوبہ سازی کی،آئی جی پنجاب اور آئی جی اسلام آباد نے دو سکواڈ بنائے ہیں،سکواڈ کا مقصد کارکنان میں انہیں شامل کر کے پولیس پر گولیاں چلوانی اور قتل کروانا ہے،ایک منصوبہ بندی کے تحت پولیس والے ہمارے کارکنان میں شامل ہو کر حملہ آور ہوں گے۔عمران خان نے اپنے ویڈیو بیان میں دعوی کیا تھاکہ یہ لوگ منصوبے کے تحت میرے گھر تک آکر مجھے مرتضی بھٹو کی طرح قتل کریں گے،کارکنان کو تنبیہ کر رہا ہوں ہم نے کسی بھی قسم کے تصادم میں حصہ نہیں لینا،یہ لوگ جو مرضی کریں ہم نے کچھ نہیں کرنا۔
