اسلام آباد (مانیٹرنگ ڈیسک) ملک میں انٹرنیٹ سروس اور سوشل میڈیا ایپس کی بحالی کے بعد وفاقی وزیر آئی ٹی کاموقف بھی آگیا اور انہوں نے سوشل میڈیا پر پابندی کے فیصلے کی مخالفت کرتے ہوئے بتایا کہ اس معاملے پر وزیراعظم سے بھی بات ہوچکی ہے ، وزارت انفارمیشن ٹیکنالوجی ایسی کسی بھی پابندی کیخلاف ہے جس سے ترقی رکتی ہو۔
اپنے ایک بیان میں امین الحق نے کہ کسی بھی سوشل میڈیا کا بلیک آﺅٹ یا انٹرنیٹ کی بندش مسائل کا حل نہیں، پی ٹی اے آزاد ادارے کے طور پر کام کرتاہے، انٹرنیٹ سروس متاثر ہونے سے اربوں کا نقصان ہوا، آئندہ بھرپور کوشش کروں گا کہ مستقبل قریب میں انٹرنیٹ سروس بند نہ ہو تاہم مخصوص علاقوں میں انٹرنیٹ بند کیا جاسکتا ہے۔
وفاقی وزیر کا کہنا تھا کہ وی پی این مسئلے کا حل نہیں، ہمیں براڈ مائنڈ ہونا ہوگا، سوشل میڈیا کا غلط استعمال ہوا، وکی پیڈیا ڈیڑھ ماہ بند ہوا تھا، ہم نے فوری اقدامات کیے اوربحال کرایا، آئی ٹی انڈسٹری کو سہولیات فراہم کرنیکی کوشش کی جائیگی۔
