عوام دشمن اقدامات ختم نہ کیے تو دھرنوں سے حکمرانوں کو گھر جانے پر مجبور کردیں گے،سعد رضوی نے بھی اعلان کر دیا

لاہور (سٹاف رپورٹر )تحریک لبیک پاکستان(ٹی ایل پی )کے امیر حافظ سعد حسین رضوی نے کہا ہے کہ پی ڈی ایم کی حکومت کو آخری دنوں میں تو عوام پر ترس کھانا چاہیے،اگر حکومت نے عوام دشمن اقدامات ختم نہ کیے تو دھرنوں سے حکمرانوں کو گھر جانے پر مجبور کر دیں گے،لینڈ کروزر اور موٹر سائیکل والے کیلئے یکساں قیمت پر پیٹرول کی فروخت معاشی انصاف نہیں ہے۔
اپنے ایک بیان میں حافظ سعد حسین رضوی کا کہنا تھا کہ تیل کی قیمتوں میں اضافہ تو پہاڑ جتنا ہوتا ہے لیکن کمی چیونٹی کے برابر بھی نہیں کی جاتی۔عالمی منڈی میں قیمتیں بڑھنے پر تو پاکستان میں عالمی منڈی کے مطابق تیل کی قیمتیں بڑھا دی جاتی ہیں لیکن کم ہونے پر معمولی کمی کی جاتی ہے،22 مئی کو کراچی سے شروع ہونے والا لانگ مارچ مہنگائی،بے روزگاری،لاقانونیت سمیت عوام کے حقوق پر ڈالے گئے ہر ڈاکے کا حساب لے گا۔حافظ سعد رضوی نے مزید کہا کہ پاکستان ڈیموکریٹک موومنٹ(پی ڈی ایم )حکومت کے ہر فیصلے سے عوام کی تکلیف میں دن بہ دن اضافہ ہوتا چلا جا رہا ہے۔