لاہور(سٹاف رپورٹر )پاکستان تحریک انصاف( پی ٹی آئی)کے سربراہ اور سابق وزیراعظم عمران خان نے قومی احتساب بیورو( نیب) کے طلبی نوٹس کا جواب دے دیا۔
”پاکستان ٹائم“ کے مطابق عمران خان نے نیب طلبی کے نوٹس کا جواب دیتے ہوئے کہا ہے کہ مختلف مقدمات میں قبل ازگرفتاری ضمانتیں کرانے کے لیے لاہور میں ہوں، اسلام آباد ہائی کورٹ نے 22 مئی تک مقدمات میں ضمانتیں لینے کا وقت دیا ہے، نیب میں پیش نہیں ہو سکتا۔پی ٹی آئی چیئرمین کا کہنا ہے کہ نیب انکوائری کو انویسٹی گیشن میں تبدیل کرنے کا کام غیرقانونی ہے، نیب قانون آئین سے متصادم ہے۔عمران خان نے جواب میں نیب سے انکوائری رپورٹ بھیجنے کی بھی درخواست کی۔واضح رہے کہ گزشتہ روز نوٹس میں عمران خان کوجمعرات صبح 10 بجے نیب راولپنڈی میں پیش ہونے کی ہدایت کی گئی تھی۔نیشنل کرائم ایجنسی برطانیہ کے 190 ملین پاونڈ کے کیس میں قومی احتساب بیورو (نیب) نے چیئرمین پی ٹی آئی عمران خان کو طلبی کا نوٹس دیا تھا۔
