فوجی تنصیبات، شہداءکی یاد گاروں اور قومی عمارات پرحملے،چیئرمین اسلامی نظریاتی کونسل بھی میدان میں آگئے

اسلام آباد(سٹاف رپورٹر)اسلامی نظریاتی کونسل کے چیئرمین ڈاکٹر قبلہ ایاز نے اس بات پر اطمینان کا اظہار کیا ہے کہ پوری قوم نے فوجی تنصیبات، شہدائ کی یاد گاروں اور قومی عمارات پر حملوں کی مخالفت اور مذمت کی ہے۔ نیز تمام سیاسی جماعتوں اور مذہبی تنظیموں نے اس طرح کے اقدامات کو نا مناسب قرار دیا ہے۔ ڈاکٹر قبلہ ایاز نے 9 مئی کو پیش آنے والے واقعات پر شدید دکھ اور افسوس کا اظہار کرتے ہوئے کہا کہ اس دن جو کچھ ہوا وہ پاکستان کی تاریخ کا سیا ہ باب ہے۔ فوجی تنصیبات ، شہداءکی یادگاروں اور قومی عمارات پر حملوں کو پوری دنیا میں دکھایا گیا اور بد قسمتی سے بھارتی میڈیا میں ان واقعات پر خوشی کا اظہار کیا گیا۔ قابل اطمینان امر یہ ہے کہ ان واقعات کی دیگر سیاسی اور مذہبی جماعتوں نے مذمت کی ہے اور قوم میں اس حوالے سے ایک اتفاق رائے پیدا ہوا ہے کہ ایسے واقعات قابل مذمت ہیں۔ مسلح افواج سے اظہار یکجہتی کرتے ہوئے ڈاکٹر قبلہ ایاز نے کہا کہ مسلح افواج قوم کا فخر اور فوجی تنصیبات ملکی دفاع کی ضامن ہیں۔ مادر وطن کی خاطر جان کی قربانی دینے والے شہداءکی یادگاروں کی عزت وتوقیر ملّی فر یضہ ہے۔ انہوں نے توقع ظاہر کی کہ قانون نافذ کرنے والے ادارے فوجی تنصیبات ، قومی عمارات اور عوامی املاک پر حملوں میں ملوث افراد کو جلد کیفر کردار تک پہنچائیں گے۔ ڈاکٹر قبلہ ایاز نے کہا کہ اسلامی نظریاتی کونسل نے اپنے 228 ویں اجلاس منعقدہ مورخہ 18-19 مئی میں متفقہ میثاق سیاست کی تجویز پیش کی ھی۔ اسلامی نظریاتی کونسل اب بھی یہ سمجھتی ہے کہ ملی میثاق سیاست آج کے دور کی اہم ترین ضرورت ہے تاکہ ملک کی معاشی صورت حال میں استحکام پیدا ہو اور پاکستان دنیا بھر میں ایک قابل احترام ملک کے طور پر ابھرے۔