کراچی(سٹاف رپورٹر)پاکستان پیپلز پارٹی کی سندھ حکومت نے نگران وزیر اعلیٰ کے لئے دو ناموں پر غور کردیا ہے۔
”پاکستان ٹائم“ کے مطابق سندھ حکومت کی جانب سے نگران وزیراعلیٰ کے لئے سابق جج سپریم کورٹ مقبول باقر اور سابق چیف سیکریٹری ممتاز شاہ کے ناموں پر غور کیا جا رہا ہے۔اس ضمن میں ماہرین کا کہنا ہے کہ وزیر اعلیٰ سندھ اور قائد حزب اختلاف کے درمیان مشاورت ضروری ہے۔ذرائع نے بتایا کہ جون میں بجٹ پیش کرنے کے بعد نگران حکومت کے لئے کام تیز کردیا جائے گا۔دوسری جانب سندھ اسمبلی میں قائد حزب اختلاف کی تبدیلی کاعمل بھی جاری ہے، ایم کیو ایم اپوزیشن لیڈر میں دلچسپی ظاہر کرچکی ہے۔اس کے علاوہ پیپلز پارٹی کی جانب سے پاکستان تحریک انصاف( پی ٹی آئی) کے حلیم عادل شیخ کو ہٹا کر متحدہ قومی موومنٹ( ایم کیو ایم)پاکستان اور گرینڈ ڈیمو کریٹک الائنس( جی ڈی اے) کو قائد حزب اختلاف لانے کا ٹاسک دیا گیا ہے۔
