ابوجا(مانیٹرنگ ڈیسک )نائیجیریا میں ایک مسجد کی چھت اس وقت گر گئی جب وہاں سیکڑوں افراد نماز ادا کر رہے تھے جس کے نتیجے میں 7 نمازی جاں بحق اور 23 زخمی ہو گئے۔
غیر ملکی میڈیا کے مطابق یہ افسوسناک واقعہ نائیجیریا کے شمالی صوبے کادونا کے شہر زاریا کی 1830 میں تعمیر کی گئی مسجد میں پیش آیا۔تاریخی حیثیت کی حامل مسجد میں حادثے کے وقت 200 سے زائد افراد نماز پڑھ رہے تھے۔ ایمبولینس کے ذریعے 50 سے زائد نمازیوں کو ہسپتال منتقل کیا گیا جہاں سات افراد کے جاں بحق ہونے کی تصدیق کر دی گئی جب کہ 23 افراد کو شدید زخمی حالت میں ہسپتال میں داخل کر لیا گیا۔ریسکیو ٹیم کے انچارج نے بتایا کہ تاریخی مسجد کی چھت گرنے سے چار نمازی موقع پر ہی جاں بحق ہوگئے جب کہ امدادی کاموں کے دوران مزید تین لاشیں ملیں۔ زخمیوں میں سے پانچ کی حالت نازک بتائی جا رہی ہے۔سوشل میڈیا پر وائرل ہونے والی ویڈیوز میں دیکھا جا سکتا ہے کہ مسجد کے ایک حصے کی چھت گری ہوئی اور کئی افراد ملبے تلے دبے ہوئے ہیں۔سوشل میڈیا پر صارفین کا کہنا تھا کہ یہ واقعہ نماز جمعہ کے وقت پیش آیا تھا۔یاد رہے کہ گزشتہ برس نائیجیریا میں ایک درجن سے زائد عمارتیں گرنے کے واقعات پیش آئے تھے۔
