حیدر آباد(وقائع نگار خصوصی)پاکستان پیپلز پارٹی کے چئیرمین بلاول بھٹو زرداری نے نعرہ مستانہ بلند کرتے ہوئے کہا ہے کہ الیکشن میں ہم مقابلے کے لئے تیار ہیں،اتحادی الیکشن سے بھاگ رہے ہیں تو انہیں بھاگنے دو،اتحادیوں سے کہتا ہوں ڈرو گے تو مرو گے۔
یہ بھی پڑھیں:کسی سیاستدان کیخلاف کارروائی نہیں کی جا رہی،نگران وزیر داخلہ سندھ بھی بول پڑے
”پاکستان ٹائم “ کے مطابق حیدر آباد میں چھ ملین گیلن پانی کی فراہمی کے واٹر فلٹر پلانٹ منصوبے کے افتتاح کے بعد ہونے والی تقریب سے خطاب کرتے ہوئے بلاول بھٹو زرداری نے کہا کہ نالائق کو نکالنے کے لیے عدم اعتماد کی کامیابی حیدر آباد کے عوام کی وجہ سے تھی،اگر وہ وزیر اعظم نہیں رہا تو جیالوں کی محنت کی وجہ سے نہیں رہا۔بلاول بھٹو نے کہا کہ آج میں آپ سے مانگنے نہیں بلکہ آپ کو دینے کے لیے آیا ہوں،حیدر آباد کے عوام کو پینے کا پانی ملے گا،ہمیں ہر شہر میں صاف پانی پہنچانا ہے،ہم اپنے منشور پر الیکشن لڑیں گے،میں پاکستان کے عوام پر بھروسہ کرتا ہوں،میں عوام کے پاس جاوں گا اور بتاوں گا کہ میں ملتان،فیصل آباد اور پشاور کو بھی پانی دینا چاہتا ہوں۔بلاول بھٹو زرداری نے کہا کہ اتحادی الیکشن سے بھاگ رہے ہیں تو انہیں بھاگنے دو،اتحادیوں سے کہتا ہوں کہ ڈرو گے تو مرو گے،الیکشن سے بھاگنا پیپلز پارٹی کی ٹریننگ میں نہیں ہے،جناح ہاوس پر حملہ کرنے والوں کو پیغام ہے کہ ہم مقابلے کے لیے تیار ہیں،پیپلز پارٹی کے جیالے آپ سے نہیں ڈرتے،ہم الیکشن میں ملک کے کونے کونے میں سیاسی یتیموں اور کٹھ پتلی سیاست دانوں کا صفایا کردیں گے۔بلاول بھٹو زرداری نے مزید کہا کہ پیپلز پارٹی کی کردار کشی کی مہم 3 نسلوں سے چلتی آرہی ہے،وہ سیلیکٹڈ کو مسلط کرنا چاہ رہے تھے تو پیپلز پارٹی کے خلاف نہ جانے کیا کیا کہا گیا،ہم نے جھوٹ کا منہ توڑ جواب دینا ہے۔
یہ بھی پڑھیں:نوازشریف نے بھی اپنی وطن واپسی کا اعلان کر دیا
