کراچی(ایجوکیشن رپورٹر)جامعہ کراچی کے اساتذہ نے ہڑتال ختم کرنے کا اعلان کر دیا۔تدریسی عمل معطل ہونے سے طلبہ کو پریشانی کا سامنا تھا۔
نگران وزیر اعلیٰ سندھ سے سیکرٹری یونیورسٹیز اینڈ بورڈز نے ملاقات کی،جس میں جامعہ کراچی کے اساتذہ اور انتظامیہ کے درمیان پائے جانے والے معاملات پر تبادلہ خیال کیا گیا۔سیکرٹری کے مطابق وزیر اعلیٰ سندھ جسٹس(ر)مقبول باقر نے مسائل حل کرنے کی یقین دہانی کرواتے ہوئے جامعہ کراچی میں تعلیمی سرگرمیاں بہتر انداز میں شروع کرنے کی ہدایت کی اور کہا کہ ہم خود اساتذہ کے مسائل حل کریں گے۔واضح رہے کہ جامعہ کراچی میں انجمن اساتذہ نے مطالبات کی منظوری کیلئے احتجاجاً کلاسز کا بائیکاٹ کر کے تدریسی عمل معطل کر رکھا تھا۔دوسری طرف وائس چانسلر جامعہ کراچی نے بغیر بتائے چھٹی پر جانے والے اساتذہ کو شوکاز نوٹسز جاری کر دیے تھے۔یونیورسٹی میں تدریسی عمل معطل ہونے سے طلبہ کو پریشانی کا سامنا تھا،طلبہ کا کہنا تھا کہ اساتذہ اور انتظامیہ کے تناو کی وجہ سے پڑھائی کا نقصان ہو رہا ہے۔
یہ بھی پڑھیں:جامعہ کراچی میں تدریسی عمل معطل،اساتذہ کا وزیر اعلیٰ سے نوٹس لینے کا مطالبہ
