اسلام آباد (سٹاف رپورٹر )تحریک انصاف کے سابق جنرل سیکرٹری اسد عمر نے سب کچھ واضح کردیا اور کہا ہے کہ اگر مجھے عثمان ڈار اور صداقت عباسی کی طرح کوئی ایسا کام کرنا ہوتا تو کرچکا ہوتا۔ عدالت پیشی کے موقع پر صحافی نےان سے سوال کیا کہ سائفر کیس میں چیئرمین پی ٹی آئی اندر ہیں اور آپ کو ریلیف مل گیا ، اس پر اسد عمر نے کہا کہ سائفر کیس میں الزام یہ ہے کہ جنہیں ملا انہوں نے ٹھیک استعمال نہیں کیا، ہمارا ماننا ہے کہ قانونی استعمال کیا ہے، سائفر چار لوگوں میں آتا ہے وزیراعظم، وزیر خارجہ، آرمی چیف اور ڈی جی آئی ایس آئی،ایف آئی آر میں پلاننگ منسٹر کہاں سے آگیا؟ میرا صرف نام آیا ہے۔ صحافی نے پوچھاکہ عثمان ڈار اور صداقت عباسی کی طرح کیا آپ بھی پروگرام میں جائیں گےجس پر اسد عمر نے مسکراتے ہوئےکہا کہ اگر مجھے کوئی ایسا کام کرنا ہوتا تو کر چکا ہوتا۔
