اسلام آباد(کورٹ رپورٹر )اداروں کے خلاف بغاوت پر اکسانے کے کیس میں درخواست بریت پر سماعت،سابق وفاقی وزیر اطلاعات فواد چودھری کی عدم حاضری کے باعث 25 اکتوبر تک ملتوی کر دی گئی۔
یہ بھی پڑھیں:عمران خان پر فرد جرم،نعیم حیدر پنجوتھا نے عدالتی کارروائی کی کہانی بیان کرتے ہوئے حیران کن بات کہہ دی
پاکستان ٹائم کے مطابق ڈسٹرکٹ اینڈ سیشن کورٹس اسلام آباد میں فواد چودھری کے خلاف اداروں کے خلاف بغاوت پر اکسانے کے کیس میں درخواست بریت پر سماعت جج طاہر عباس سپرا نے کی۔سابق وفاقی وزیر فواد چودھری کے بھائی وکیل فیصل چودھری عدالت کے روبرو پیش ہوئے،عدالت میں وکیل فیصل چودھری نے سماعت ملتوی کرنے کی استدعا کر دی۔فیصل چودھری نے فواد چودھری کی حاضری سے استثنی کی درخواست دائر کرتے ہوئے موقف اختیار کیا کہ فواد چودھری طبعیت ناسازی کے سبب عدالت پیش نہیں ہو سکتے،استدعا ہے کہ حاضری سے استثنی منظور کی جائے۔ ایڈیشنل سیشن جج طاہر عباس سپرا نے کہا کہ آپ اور فواد چودھری میرے لیے قابل احترام ہیں لیکن دونوں کی حاضری ضروری ہے،جس پر فیصل چودھری نے کہا کہ اکتیس تاریخ کو سپریم کورٹ بار کے انتخابات ہیں اس کے بعد کی تاریخ رکھ لیں۔جس پر جج طاہر عباس نے ریمارکس دیے کہ اتنا وقت نہیں ہے،آپ پرسوں درخواست پر دلائل دیں۔ عدالت نے فواد چودھری کے خلاف کیس کی سماعت 25 اکتوبر تک ملتوی کر دی۔واضح رہے کہ رواں ماہ 3 اکتوبر کو سابق وفاقی وزیر فواد چودھری نے اسلام آباد کی مقامی عدالت میں زیر سماعت سرکاری ملازمین کو بغاوت پراکسانے کے کیس میں بریت کی درخواست دائر کی تھی۔
یہ بھی پڑھیں:اسحاق ڈار کے خلاف کرپشن کا کوئی ثبوت نہیں،نیب نے احتساب عدالت میں ہاتھ کھڑے کر دیئے
