اسلام آباد(سٹاف رپورٹر)پاکستان تحریک انصاف(پی ٹی آئی)کے مرکزی رہنما ڈاکٹر بابر اعوان کی جانب سے الیکشن کمیشن پر قومی اسمبلی کی نشستیں کم کرنے کے الزامات پر جوابی وضاحت آ گئی ہے۔
”پاکستان ٹائم “کے مطابق ترجمان الیکشن کمیشن نے ڈاکٹر بابر اعوان کے بیان پر ردِعمل کا اظہار کرتے ہوئے کہا ہے کہ بابر اعوان کا خیبر پختون خوا کی قومی اسمبلی میں نشستیں کم کرنے پر بیان حقائق کے منافی ہے، یہ بیان مضحکہ خیز اور عوام کے ذہنوں میں ابہام پیدا کرنے کی ناکام کوشش ہے۔الیکشن کمیشن کے ترجمان نے کہا ہے کہ 25 ویں ترمیم 2018ء کے تحت سابق فاٹا کو خیبر پختون خوا میں ضم کر دیا گیا اور پھر فاٹا کی 12 قومی اسمبلی کی نشستوں کو ختم کر کے خیبر پختون خوا کی 6 نشستیں بڑھائی گئیں،خیبر پختون خوا کی قومی اسمبلی کی نشستیں 39 سے بڑھ کر 45 ہو گئی ہیں جبکہ صوبائی اسمبلی میں 16 جنرل سیٹوں کا اضافہ کر کے 99 سے 115 کر دی گئی ہیں۔الیکشن کمیشن کے ترجمان نے کہا ہے کہ بطور وکیل بابر اعوان کو کوئی بات آئین و قانون سے ہٹ کر نہیں کرنی چاہیے،قومی اور صوبائی اسمبلیوں کی سیٹوں کا تعین پارلیمنٹ کا استحقاق ہے،آئین کے مطابق مختص کی گئی سیٹوں کے مطابق الیکشن کمیشن نے حلقہ بندی کی ہے۔
