پشاور(بیورو رپورٹ)پاکستان تحریک انصاف(پی ٹی آئی) کے انٹرا پارٹی الیکشن میں بیرسٹر گوہر علی اور عمر ایوب بلا مقابلہ چیئرمین اور سیکرٹری جنرل منتخب ہو گئے۔
یہ بھی پڑھیں : سائفر کیس کی اڈیالہ جیل میں سماعت ،میڈیا کوریج پر پابندی برقرار
”پاکستان ٹائم“کے مطابق بیرسٹر گوہر علی پاکستان تحریک انصاف کے بلا مقابلہ چیئرمین منتخب ہوگئے ہیں،پی ٹی آئی انٹرا پارٹی انتخابات کیلئے پشاور کے علاقے رانڑو گڑھی میں پولنگ سینٹر قائم کیا گیا،پریزائیڈنگ آفیسر خیبرپختونخوا علی زمان سینٹر میں موجود تھے۔تحریک انصاف کے انٹرا پارٹی الیکشن کے لیے ووٹنگ کا عمل صبح 11 بجے شروع ہوا تھا، پارٹی چیئرمین کا انتخاب رانو گھڑی نزد پشاور ٹول پلازہ تحصیل چمکنی ڈسٹرکٹ پشاور میں ہوا۔اس انتخاب میں عمران خان کے وکیل اور پارٹی رہنما بیرسٹر گوہر علی خان کے بلامقابلہ چیئرمین منتخب ہو گئے جب کہ انٹرا پارٹی الیکشن کے دوران پی ٹی آئی کے چیئرمین، وائس چیئرمین، مرکزی صدر، جنرل سیکرٹری سمیت صوبائی قیادت کا بھی چناو ہوا۔پی ٹی آئی انٹرا پارٹی الیکشن کے چیف الیکشن کمشنر نیاز اللہ نیازی نے نتائج کا اعلان کیا جس کے مطابق بیرسٹر گوہر خان بلا مقابلہ چیئرمین پی ٹی آئی منتخب ہوگئے جب کہ عمر ایوب پی ٹی آئی کے جنرل سیکرٹری ہوں گے۔سپریم کورٹ کے وکیل بیرسٹرگوہر خان کا تعلق خیبرپختونخوا کے ضلع بونیرسے ہے،انہوں نے برطانیہ کی والورہیپمٹن یونیورسٹی سے ایل ایل بی اور امریکہ کے واشنگٹن سول آف لاء سے ایل ایل ایم کر رکھا ہے۔اعتزاز احسن کی براہ راست نگرانی میں وکالت کا تجربہ رکھنے والے بیرسٹر گوہر گزشتہ ایک سال سے چیئرمین پی ٹی آئی کی قانونی ٹیم میں شامل ہیں۔نتائج کے مطابق یاسمین راشد پی ٹی آئی پنجاب،حلیم عادل شیخ پی ٹی آئی سندھ،علی امین گنڈا پور خیبرپختونخوا اور منیر احمد بلوچستان کے صدر ہوں گے۔الیکشن کمشنر پی ٹی آئی کا کہنا تھا کہ انٹرا پارٹی الیکشن میں تمام پینل اور عہدیداران بلا مقابلہ کامیاب ہوئے ہیں۔پارٹی ووٹرز ایپ کے ذریعے ووٹ ڈال سکتے تھے،سینٹر سے انٹرا پارٹی انتخابات کی مانیٹرنگ ہوئی جس کے نتائج کا اعلان بھی رانڑو گڑھی سینٹر سے ہوا۔
