راولپنڈی(کرائم سیل)اینٹی نارکوٹکس فورس(اے این ایف)نے منشیات سمگلنگ کے خلاف کریک ڈاﺅن کرتے ہوئے 10کارروائیوں میں 425 کلو منشیات برآمد کر کے خاتون سمیت 7 ملزمان کو گرفتار کر لیا۔
اے این ایف کے ترجمان کے مطابق لاہور ایئر پورٹ پر 2مسافروں کے ٹرالی بیگ سے ڈھائی کلو گرام آئس برآمد ہوئی ہے جبکہ کراچی میں کوریئر آفس سے برطانیہ کے لیے بک پارسل سے 3 کلو ہیروئن اور 240 گرام آئس برآمد ہوئی ہے۔ترجمان نے بتایا کہ ٹی چوک راولپنڈی میں 1 کلو 40 گرام ہیروئن اور سوا کلو آئس برآمد کر کے خاتون سمیت دو ملزمان کو گرفتار کیا ہے۔انہوں نے کہا کہ کراچی کے قریب رکشہ میں چھپائی گئی 66 کلو چرس برآمد کر کے ملزم کو گرفتار کر لیا ہے،سپر ہائی وے پر دو انورٹرز میں چھپائی گئی 32 کلو 400 گرام چرس برآمد کر کے ملزم کو گرفتار کیا گیا جبکہ جناح کالونی کے قریب ایک شخص کے بیگ سے 9 کلو 600 گرام چرس برآمد ہوئی ہے۔ترجمان کا کہنا ہے کہ نوشکی روڈ پر مستونگ کے ایک مکان سے 100 کلو چرس اور 200 کلو افیون برآمد ہوئی ہے،اس کے علاوہ زخہ خیل خیبر کے علاقے میں چھپائی گئی 9 کلو چرس اور طورخم کے غیر آباد علاقے سے 690 گرام آئس برآمد کی ہے۔اے این ایف کے ترجمان نے کہا کہ گرفتار ملزمان کے خلاف انسدادِ منشیات ایکٹ کے تحت مقدمات درج کر کے تحقیقات شروع کر دی ہیں۔
